Tanah NCR ke udah disukat patut dikemansang

KUCHING: Pengereja pengawa Opis Tanah enggau Survei (JTS) Sarawak dipinta meransang peranak menua pesisir ngemansangka tanah ti udah diberi surat pala tanah.

Kepala Menteri Datuk Patinggi Abang Johari Tun Openg madah rayat menua pesisir dikenangi nyual tanah enti surat pala tanah NCR enda diberi.

“Nya alai, perintah bekerejasama enggau mayuh ejensi nyengkaum gerempung ukai dikuasa perintah (NGO) baka Gerempung Bansa Dayak Bidayuh Nasional (DBNA) ngambika sida muntang ngulihka surat tanah.

“Beduduk ari nya, aku ngarapka raban pengereja pengawa JTS Sarawak ngelalau mensia mayuh anang nyual tanah tang patut kemansangka tanah nya ngambika meri penguntung ngagai sida empu,” ku iya.

Abang Johari bejaku munyi nya Pengerami Makai Lemai 100 Taun JTS Sarawak di sebuah hotel tebilang ditu, kemari.

Ku iya, lalau ti diasuh iya nya ukai pengawa ti meseti digaga tang iya andalka semua pengereja pengawa JTS Sarawak sama mantu perintah meri penerang ti beguna ngagai peranak di menua pesisir.

“Pekara tu meri empas ngagai pengidup sida empu laban pengudah sida nyual tanah nya, sida empu lalu nadai tanah agi.

“Diatu, rayat menua tu udah meretika pekara pasal nyukat tanah NCR nengah Seksyen 6 enggau Seksyen 18.

“Nya kebuah, pengereja pengawa JTS Sarawak ditambah mayuh agi ngambika ulih mantu ngurangka isu bekaul enggau tanah NCR,” ku iya.

Tambah iya, taja kediatu menua majak mansang enggau penumbuh teknologi baru, tang sesebuah menua agi begunaka tanah endur ngereja pemansang.

“Kitai deka mansang ngagai pengawa betanam betupi moden nengah teknologi ti baru.

“Taja pia, dalam ngaga pekara nya, kitai agi begunaka dandang tanah ti besai nya kebuah JTS Sarawak meruan nyadi sebengkah ejensi perintah ti pemadu beguna,” ku iya.