KUCHING: Pun kayu ari bansa ke dipilih aja ulih ditebang lalu ukai ari kampung ke agi rumpas, ku Kepala Menteri Datuk Patinggi Abang Johari Tun Openg.
Kenu ku iya, pengawa milih bansa kayu ke ditebang, ulih dipilih ngena dron.
“Pengudah ditebang kitai deka ngemeranka pengawa nanam baru kayu enggau bansa kayu ke berega.
“Pia mega, kayu apung enggau mulung pan entara bansa utai tanam ke berega,” ku iya.
Iya mansutka pekara nya ba aum pemberita pengudah bejadika Le Tour De Restoration (Kimpin Sarawak Gadung) JHS nyerumba bulan inovasyen Servis Opis Perintah Sarawak ditu ensana.
Ku Abang Johari, apung enggau mulung patut ditanam ba endur ke engkeman.
“Nya alai, kitai begunaka teknologi dikena ngumpul data enggau nentuka kayu ti manah dikena ngaga Sarawak nyadi gadung.
“Pun kayu ke bisi ba Sarawak endang deka mantu ngemujurka juluk kimpin Malaysia Gadung,” ku iya,
Maya ditanya bekaul enggau pengaw meri vaksin ngagai rayat Sarawak, Abang Johari madah semua pengawa nya bejalai enggau mujur.
“Serikat Pzifer-BioTech mega udah ngemansangka vaskin Covid-19 nengah chara pil lalu kitai endang nyukung pengawa nya.
“Nyadi enda ibuh agi dituchuk,” ku iya.
Sama bisi datai Sapit Kepala Menteri Datuk Amar Awang Tengah Ali Hasan, Menteri Muda Perambu Mengeri, Pengatur Tanah enggau Rampa Menua Datuk Len Talif Salleh, Sekretari Perintah Besai Sarawak Datuk Amir Omar, Sapit Sekretari Perintah Nengeri (Transformasyen Sosio Ekonomi), Datuk Seri Mohamad Abu Bakar Marzuki, Sapit Sekretari Perintah Sarawak (Transformasyen Menua Pesisir), Datuk Ik Pahon Joyik, Sapit Sekretari Perintah Nengeri (Transformasyen Pengawa Enggau Rikod Servis) Datuk Dr. Sabariah Putit, Sekretari Mendam OPis Menteri Pemansang Mengeri enggau Rampa Menua Sarawak Datuk Sr Zaidi Mahdi sereta Direktor Kampung Sarawak Datuk Hamden Mohammad.
