Tanam mayuh kayu panjai urat, kurang bedaun

KUCHING: Pun kayu ti deka ditanam ba sepemanjai jalai alun ba Kuching deka diganti enggau pun kayu ti panjai urat sereta kurang bedaun.

Menteri Muda ba Opis Kepala Menteri (Pekara Islam enggau DBKU) Datuk Dr Abdul Rahman Junaidi madahka empas ari penyadi pun kayu tumbang apin lama opis menteri iya sigi ngemeratka pekara tu sentang pengawa nanam kayu ba tisi jalai alun.

“Pun kayu ti ditanam ba tisi jalai endang enggau tuju deka ngemanahka rampa menua, tang diatu pun kayu tu meri penanggul ngagai kitai laban umur iya udah tuai.

“Nya ti ngasuh dan pun kayu nya mayuh patah sereta tumbang lebuh hari kudi,” ku iya.

Abdul Rahman bejaku munyi nya lebuh ditanya pemberita ba Program Siruka Rampa Menua, Sayauka Sungai Kitai di Esplanade Kampung Gersik ditu, kemari.

Ku iya, diatu Dewan Bandaraya Kuching Utara (DBKU) benung merambu deka nanam kayu ti tegap sereta tan ba sepemanjai jalai di mengeri Kuching.

“Aku deka berandau enggau Datuk Bandar DBKU ngambika milih bansa kayu ti engkeman ditanam dikena nukar pun kayu ti udah lama.

“Pun kayu ti dipilih patut panjai urat laban pun kayu ti ba tisi jalai alun kediatu nya bansa kayu ti ngembuan urat pabu ngujungka pun kayu nya jampat tumbang maya biau balai.

“Pia mega kitai deka ngiga pun kayu ti mimit daun, reti iya pun kayu nya semina bedaun nitih musim sereta enda bedaun galak ninting hari,” ku iya

Suara Sarawak