KUCHING: Raban pekebun lada diperansang nanam bansa lada ti sama dalam sebuah kebun ngambika kualiti lada ulih dijaga.
Sapit Menteri Pengawa Bekebun enggau Komoditi ll Datuk Willie Mongin madahka nanam mayuh bansa lada ba kebun nyadi pemar endur nentuka tikas kualiti lada ti dikarang.
“Kami meda siku pekebun lada nanam sampai empat ke lima bansa lada dalam sebuah kebun.
“Nya alai, lebuh lada udah mansau semua lada nya dikarang berchampur baka lada amai, lada semenggok, lada semenggok emas enggau ke bukai,” ku iya.
Willie bejaku munyi nya ngagai pemberita ba aum media di Opis Kaunsil Lada Malaysia (MPB) ditu kemari.
Ku iya, diatu industri lada menua mayuh berchampur (berkecamuk) sereta meri pemar ngagai sida ngelala kualiti lada ti betul.
“Enti bansa lada ti ditanam tu dikelala, kitai ulih meda ari sukut penulin bansa lada enggau pekara bukai.
“Tu entara chara kami deka negapka industri nya ba renggat akar umbi kelimpah meri penerang nengah online tauka offline.
“Pia mega, kami deka nyuruh pemesai bekaul matau raban orang bekebun lada awakka ulih mantu sida,” ku iya.
Iya madahka, dalam mantu orang bekebun lada ti diau ba menua pesisir, opis menteri deka bejalai seriris enggau juluk perintah ti keran deka ngeluaska teknologi arus penyambung (jalur lebar) di serata menua nyengkaum Sarawak.
“Nya alai, dalam pekara tu kami nyikap diri nengah konten sereta aplikasyen ti ulih dikena seriris enggau projek ti benung diatur baka Pelin Kaul Digital Menua (Jendela) enggau projek fiber optik ba baruh Opis Menteri Komunikasyen enggau Multimedia Malaysia (KKMM).
“Aku nemu sekeda palan di menua pesisir agi bedau bisi line internet tang sistem ti dipejalaika MPB ulih dikena offline.
“Aku bepesan ngagau MPB ngambika ngatur kaul enggau raban pekebun mit awakka sida nemu pasal pekara tu,” ku iya.
Berebak enggau nya, iya madahka, entara perambu bukai ti diperunding sida iya nya orang ti deka bekebun lada mesti nyereta kus latih dikena ngulihka penemu pemun nanam lada.
“Kekadang sida ti deka nanam lada, meli paung lalu tanam aja.
“Lebuh pengawa sida nanam lada nadai mujur sida madah rugi nanam lada.
“Kebendar, sida nadai penemu pemun ti patut ditemu lebuh nanam lada, pekara tu deka dikemanahka kami,” ku iya.
Sama bisi datai Sapit Tuai Direktor (Pemansang) MPB Vincent Sawat enggau Sapit Tuai Direktor (Operasyen) MPB Jenny George.
