Tanda Arang Kadang

“Tanda tu bepelasarka burung kenyalang. Sida bisi mai perengka dikena betanda iya nya bulu burung kenyalang.”

Nengeri Sarawak diuan pupu bansa ti ngayanka pengelantang pengidup berekat ari penyerakup enggau pemanah kaul ti meruan.

Suku bansa ke bisi ba nengeri tu dibagi ngagai diau ba kandang tebing pantai, ulu sungai, menua pesisir enggau ba kandang tanah tinggi.

Bida jaku, adat, main asal enggau daya idup ngujungka nengeri tu dipeda chukup nyelai.

Malam kedua program ‘Movie Nights & Local Delights’ iya nya malam ungkup bansa Dayak.

Tanda Arang Kadang

Ungkup penemu bansa Dayak dibagi ngagai dua. Bansa Iban digelar Dayak Laut, lalu bansa Bidayuh digelar Dayak Darat.

Malam nya, mayuh aktiviti diatur baka pengawa mandangka tanda tradisonal, demonstrasyen nyumai pemakai asal Dayak, meda filem enggau ke bukai.

Entara penyelai bansa Dayak ke bisi dipandang iya nya tanda Ribad Arang ari penari Kelabit.

Penari tanda Ribad Arang iya nya Marianne Lipang Dennis, 26 enggau Sharmaine Elfira Bawih Asa, 26, asal ari Miri Sarawak.

Kenu ku Marianne Lipang Dennis, nama tanda ke dipandangka sida nya Tanda Arang Kadang.

Penari Tanda Arang Kadang, Marianne Lipang Dennis (Kiba) enggau Sharmaine Elfira Bawih Asa (Kanan)

“Penatai tanda tu ari bansa Kelabit di Bario. Tanda tu dipeturun kenyau ari aki ini sida kelia.

“Iya suah dipandang jam pengerami enggau pengawa merindang,” ku iya.

Arang Kadang suah agi dipandangka bebala mayuh nengah chara berintai panjai ba mua bala temuai.

“Tanda tu bepelasarka burung kenyalang. Sida bisi mai perengka dikena betanda iya nya bulu burung kenyalang.

“Kelimpah nya, gaya tanda nya mega mandangka asai ati burung kenyalang ti lantang ati maya lepau terebai ba kampung puang,” ku iya.

Ari mit, Marianne enggau Sharmaine rindu belajar tanda Arang Kadang.

“Terubah iya, indai Sharmaine ti ngajar kami dua betanda. Kamu dua bepun belajar tanda tu maya umur 5 taun.

“Kami belajar beraban. Aku chukup betuah lalu berasai gaga ati laban indai Sharmaine deka ngajar kami tanda asal tu,’ ku iya.

Kenu ku Marianne, Tanda Arang Kadang selalu iya dipandangka pengelama 5 ngagai 7 minit.

Kenu ku Sharmaine, penyampau penari enda ditatak. Kekadang ulih sepasang iya nya dua tauka lebih, kala mega sampai enam ngagai enam iku penari.