Tanka pemanah kaul pupu bansa

SIMANGGANG: Kaul bebaik ulih narak pemereti ati enggau basa entara rayat pupu bansa.

Penyanding Penemu Gerempung Indu Dayak Sri Aman (GIDSA) Norina Umoi Utot madahka pemaik enggau pengelantang ke datai ari pemanah kaul pupu bansa di menua tu nyadika berekat ke ulih diasai ba pengidup kitai.

Ku iya, udah tanggung pengawa semua nyaga manah kaul bebaik tu lalu anang sesekali ngereja ulah ti tau munuh kaul penyerakup pupu bansa.

“Kitai ngena peluang baka hari besai ngusung pangan diri ngambi tanggam kaul entara kitai semampai disintal teguh.

“Jaku ke changka, ngemaruh enggau ngelese nya enda tau ditarak ngagai rebak baru laban nya tau ngajar sida nyadi orang ti enda ngasika jaku.

NYUNGKAK EKONOMI… Peranak Rumah Joel mantaika sekeda produk diasilka sida.

“Nya alai kitai enda tau enda ngimpun ulah enggau jaku diri empu laban semua tu mai pangka besai ngagai komuniti kitai jemah ila,” ku iya ngelalau.

Norina mansutka jaku nya lebuh dikangau nyadi tuai pengabang ba Pengerami Mantar Krismas ba Rumah Joel, Bijat ditu malam kilah ensanus.

Iya madah, awak baka tu patut dikena manah endur semua datai gempuru enggau ngerami hari besai raban orang Kristian ti ngintu pengada Tuhan sida.

“Penatai bala pengabang ari pupu bansa enggau pengarap malam tu ukai semina ngerichahka pengerami kitai tang aku chukup temegah ati meda pengerapat kaul entara kita.

“Tu mih ke chuan teladan anak uchu ichit wit kitai jemah, tetap beserakup taja bebida pemakai, main asal, pengarap enggau budaya idup.

CHUKUP NYAMAI… Asi baru ditungkus ngena upih pinang entara pemakai bisi dinah lebuh makai serumpu ba ruai.

“Taja pia kitai anang enda ingat, lebuhka berami tu mesti nitihka Atur Standard Pengawa (SOP) kena nyamin pengerai enggau nyaga pengelikun semua,” ku lalau Norina.

Beserimbai enggau pengerami malam nya, bemacham main ungkup sida ke besai tuai enggau anak mit bisi diatur kelimpah makai serumpu ba ruai.

Bisi Pekit Bejalai Bebala Mayuh Krismas ti mandangka gaya pengidup enggau budaya idup baka orang bumai, bekebun, pengawa betanamka jagung, nembiak sekula enggau ke bukai.

“Entara pemakai asal bisi dinah ke narit ati lebuh makai serumpu ba, asi ditungkus ngena upih pinang.

“Asi baru chukup bau rengut ditambah enggau bemacham lauk rumah panjai, kuah daun babas chukup pemanis. Nyau enda berasai nambah sepinggai asi.

TUAI JEMAH ILA… Nembiak ari Sekula Primari (SK) Tanjung Bijat mega bisi ngambi bagi ba atur program Mantar Krismas sehari nya.

“Terima kasih ke pemanah budi kita serumah ku udah kiruh bebelaka pemakai, ngintu emparu enggau mela kami ke datai nemuai pulai hari tu,” ku iya mantaika pengaga diri.

Ngena peluang nya, Norina muji insiatif peranak Rumah Joel nyungkak ekonomi sida nengah produk ari asil betanam betupi.

Rambai jaku ‘Bedagang Ngangkatka Ekonomi’ dipegai nyadika peransang sida ngemajuka diri ba pengawa nya.

NARAK PEMERETI ATI… Bala menyadi ari raban bansa Melayu mega bisi datai ngulu pengerami Mantar Krismas ba Rumah Joel, Bijat.