Taska enggau tadika tau dibuka – Fatimah

KUCHING: Taska enggau tadika ba semua bagi menua di Sarawak dikemendar dibuka kelimpah ba bagi menua Sibu.
Menteri Pengintu Pendiau, Pengelantang Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka bagi menua ti kena Atur Tagang Mindah Belebas (PKPB) endang dikemendarka muka taska enggau tadika kelimpah Bagi Menua Sibu ti kena Atur Tagang Pejalai (PKP).
“Kebuah kitai ngemendarka taska enggau tadika ti dibuka endang dikena mantu raban gawa diluan enggau pengajar ti deka gawa enda lama agi.
“Sida begunaka palan ti selamat ungkup bala anak diau sebedau sida nurun gawa, palan ti selamat tu reti iya palan ti endang nitihka Atur Pengawa Standard (SOP) ke betul,” ku iya.
Fatimah bejaku munyi nya lebuh ditanya pemberita rambau bejadika Program Komuniti McDonald’s enggau RMHC di sebuah palan bebeli barang ditu, kemari.
Ku iya, taska enggau tadika ti deka dibuka endang nitihka SOP sebedau, maya enggau pengudah beroperasyen.
“Tadika enggau taska endang dipatau rat sebedau dibuka baka meresi palan, meri jaku gerah ngagai pengajar enggau apai indai sereta nakah mija nembiak.
“Pom pengerai deka diisi apai indai lalu kami ngarapka taska enggau tadika ti deka dibuka ila selamat ungkup anak mit.
“Enti palan tu enda dibuka kini apai indai ti deka gawa nganjung anak sida, kekadang sida nganjung anak ngagai orang bukai ti enda ditemu bisi nitihka SOP tauka enda,” ku iya.
Fatimah madahka, muka taska enggau tadika nyadi entara sistem sukung perintah ngagai apai indai ti gawa dalam menua tu.
“Enda lama agi nembiak ti deka napi peresa besai deka sekula betemu mua enggau bala pengajar.
“Kami bisi nerima timbal ari raban pengajar ti minta taska enggau tadika dibuka ngambika bisi ngibun anak sida.
“Nyema taska tauka tadika nya bisi ngembuan nembiak ke bisi tanda kena rampit, iya deka diisolasyen ba palan bukai seraya nganti apai indai mai nembiak nya ke sepital lalu nyema nembiak nya positif palan nya deka ditutup tekala nya,” ku iya.
Tandu Fatimah, naka diatu taska enggau tadika di Sarawak ke dibuka nadai kala ngerikodka kes positif.
“Kes ke nyadi sebedau tu ketegal pejalai rama ruang bilik nembiak tang ukai datai ari taska tauka tadika.
“Nya kebuah pom pengerai beguna dikena nemu kini pejalai sida sebedau tama ke dalam taska tauka tadika,” ku iya.

Suara Sarawak