SEMATAN: Tiap taska ti direjister ba serata menua dipinta masang kamera litar betutup (CCTV) dikena mutar kes menyati anak mit.
Menteri Pemansang Indu, Ruang Bilik enggau Komuniti, Datuk Seri Nancy Shukri madah, atur terit deka dipejalai ngagai pengempu taska ti enda ngemaru lisin sida sereta enda masang CCTV ba taska sida.
Taja pia, ku iya, agi mayuh pengempu taska enggai nitih atur taja pen opis menteri sida udah minta raban nya masang CCTV nitih atur ba baruh Akta Taman Asuhan Kanak-Kanak 1984.
“Pengawa masang CCTV meseti dititih ba semua palan. Maya numbuh palan nyaga anak mit, sida diberi timpuh sah lima taun ti dikemendar undang-undang.
“Laban lisin meseti dikemaru genap lima taun sekali, kami deka mansik dulu taska sida lalu meda CCTV sebedau kami ngemendarka lisin dikemaru.
“Enti sida nadai masang CCTV tu, kami deka nerit atur ngagai sida,” ku iya.
Nancy mansutka jaku nya ba aum pemberita pengudah bejadi Pengawa Nutup Pengerami Sematan 2023 ditu, kemari.
Kaban Parlimen Santubong nya madah, kes menyati anak mit ba taska diatu ba tikas ti ngirau ke ati enggau pukul rata 20 kes diripot nyadi ninting hari.
“Tu bepelasar ke kes ti diripot aja lalu penyampau tu engka tinggi agi ari nya laban bisi kes ti enda diripot.
“Nya alai, pengempu taska patut nitih atur laban pengawa masang CCTV deka nambahka pengandal ati apai indai nganjung anak sida ngagai taska laban sida ulih nemu enti bisi penyadi kes menyati,” ku iya.
