Tatak umur ba Adat Tikah patut ditetap

KUCHING: Kaunsil Adat Istiadat Sarawak (Mais) patut bisi tatak umur abis biak ba atur tikah nitihka adat ba menua tu.

Menteri Pengintu Pengelantang Pendiau, Komuniti, Orang Indu enggau Pemansang Anak Mit (KWKPK), Datuk Seri Fatimah Abdullah madah, naka diatu nadai tatak umur ditetap ba atur tikah nitihka adat dalam Mais.

“Enti baka sistem tikah syariah, lelaki meseti berumur 18 taun lalu enti indu ke biak ari 16 taun meseti bisi pemendar.

“Naka diatu Mais benung bebendar deka nyemelaka tatak umur abis biak tikah nitihka adat,” ku iya.

Ba lansa bukai, Fatimah mega madahka siti pansik bekaul enggau Indeks Pengelantang Rama Sarawak (SSWI) benung dipejalai raban pemansik Universiti Malaya enggau Unimas taun tu.

“Pansik tu dipejalai dikena beratika tatak umur sereta pekara ti meri bekau ngagai pengelantang rama ba renggat nengeri.

“Tu mega deka meri kelai enggau banding ti terang pasal pejalai pemansang ekonomi rama ti patut dikemanah ngambika pengelantang seruran dijaga,” ku iya nambah.

Fatimah madah munyi nya lebuh nyimpul Wacana Minda: Buketin Indikator Rama Sarawak Siri Masa 2015-2016 di Auditorium Pustaka Negeri Sarawak, ditu tadi.

Suara Sarawak