Tebah Sape ke serata dunya

Elizabeth Bungan nama ke udah tebilang ngangatka Sape di menua tu enggau ngagai menua luar

“Kitai deka meda main asal kitai tu ngerembai ke serata dunya ngambika bansa kitai dikelala tiap iku orang ba serata dunya.”

NAMA Elizabeth Bungan, siti nama ke udah tebilang ba pengawa nebah Sape baik ba menua tu tauka dikelala ba renggat dunya.

Asal penatai ari Nanga Metah, Kapit (sepiak indai) enggau Long Atun, Baram (sepiak apai), indu dara berumur 29 taun tu suah agi dikangau bala bakih enggau nama Bungan tauka Elly.

Ngerintai pengerindu iya ba pengawa nebah sape, iya kala begulai enggau Ilu Leto di
World Harvest Festival 2017 udah nya di Rainforest World Music Festival 2017.

Kelimpah ari nya, iya enggau raban iya bela mantaika pengelandik nebah Sape ba World Music Festival di Taipei 2018, Peninsula Music Festival di Hengchun 2018 enggau Senasenai Festival di Pingtung 2018, Taiwan.

ENDA RANGKA PENEMU: Bungan bela ngajar nembiak mit nebah sape.

“Enti kediri (solo), aku kala merindang mensia mayuh maya Danau Sentarum Kalimantan ba taun 2017 enggau maya ba Harvest Festival di Sarawak Cultural Village, 2018 sereta kala bemain ba Pengerami Mandangka Main Asal Borneo (BCF) 2016 di Sibu,” pia ku iya maya berandau enggau pengarang, kemari.

Ukai semina rindu tang tampak dipeda ba Bungan iya nya pengeransing iya deka nurunka main nebah Sape ngagai nembiak rebak baru.

Siti ari kebuah laban ba iya, iya enggai meda main asal lama tu tau punas ketegal ubah pemansang dunya.
Nya alai, berengkah taun 2017, iya belabuh ngajar orang bukai nebah Sape di Sibu.

Sida ke diajar iya tu enda ngira umur, tuai biak, indu lelaki tang semua sida ke bela bisi pengerindu sereta pengeransing baka iya ngetanka main nebah Sape.

“Taja pan pia, tengan taun 2018 aku mindah gawa ke Kuching.

TANKA MAIN ASAL: Bungan (kiba) pengudah tembu pengawa ngajar bala nembiak nebah Sape.

“Tang aku mengkang nandu pengawa ngajar nebah Sape di Union Learning Centre (Uni-Central Samarahan), ” ku iya madah.

Bungan madah, pengawa iya nya nerima timbal ke manah hari mensia mayuh.

“Sida ke belajar tu mega majak nambah nyentuk minta mayuh agi pengajar ngajar sida.

“Tambah mega, aku ransing bendar ngajar sida laban main asal kitai tu patut diturun ngagai rebak baru sebedau tiun Sape nyau nadai didinga agi ketegal pemansang dunya,” pia ku iya.

Ku Bungan ba iya, pekara ke patut dirunding maya jeman tu iya nya pengawa nebah Sape meseti bisi ditebah nyentuk ke ila-ila.

BERENGKAH ARI MIT…Bungan benung ngajar bala anak mit nebah Sape.

“Kitai deka meda main asal kitai tu ngerembai ke serata dunya ngambika bansa kitai dikelala tiap iku orang ba serata dunya,” pia ku iya andal.

Awak tu mega dikena Bungan meri jaku pengaga ati sereta beterima kasih ngagai bala nembiak ti enda kakang ati bela belajar nebah Sape.

“Ngagai nembiak rebak baru, terima kasih laban bela enggau kitai bebendar ngetan main asal kitai.

“Enda ngira tiun traditional tauka tauka tiun kontemporari amat mih kitai ingat ke tiun asal bansa diri,” ku iya ngujungka randau.

TEBILANG: Maya mantaika pengelandik nebah sape di Sarawak Cultural Village suba.

 

ELIZABETH BUNGAN…

Suara Sarawak