Tebaloi Layah seruran laku

Tebaloi tauka Tebaloi Layah nyadi siti ari produk asal ti tebilang ngagai peranak menua tu enggau temuai menua tasik.

Tebaloi Layah digaga ari sepur sagu, inyak, telu, gula enggau utai ti meri asai.

Mukah, menua mansutka tebaloi tu, dalam taun 1980an suba endang nerima mayuh peminta enggau nyadi dagang besai peranak menua nya.

Tang diatu, semina tiga pedagang aja mengkang mansutka produk tebaloi tu, penyampau produk ti mayuh lalu produk Tebaloi Layuh digaga ngena chara lama ba Kampung Tutus Hilir.

DAGANG TEBALOI LAYAH

erima jaku peransang ketuai genturung pendiau sebedau tu ti dekaka kilang ngaga Tebaloi Layah seruran ditan, Fatimah Shahminan, 55, orang dagang Tebaloi Layah ari Kampung Tutus Hilir Mukah, nampung singkang ke mua ngemajuka dagang tu.

Kenyau ari 1977, lebuh umur manggai 13 taun, lepas sekula primari chakah nyaup indai iya enggau ransing gawa begulai enggau bala bakih bukai ngaga Tebaloi Layah ba kilang genturung pendiau nya.

CHARA LAMA: Tebaloi Layah deka ditetak mit sebedau disimpan dalam kambut.

“Nyauka semua indu lunggar umur besaup ngaga Tebaloi Layuh tu, tang diatu tebal agi sida ti serambau enggau orang tuai bukai udah dulu midang.

“Lebuh beratika nadai peranak bukai ti deka nampung dagang tu, nya kebuah aku seruran gawa enggau nginta kilang nyentuk diatu,” ku iya ngelansa.

“Belajar enggau nunda chara indai enggau peranak bukai ngaga tebaloi ti nyadika malin aku empu diatu.

“Aku mega mujur ngajar anak diri empu nampung pengawa tu, besaup gawa,” ku iya.
Puh gawa, liat ati enggau pemintar runding ngatur pekara wang enggau nentuka puku beguna amat nentika pemujur ba dagang tebaloi tu, ku iya.

Nyentuk diatu, Fatimah disaup empat anak iya enggau sida sebilik bukai udah nali dagang tu.
Kenu ku anak iya, Shamsiah, 34, peminta produk tebaloi deka majak nambah maya musim hari besai baka Krismas, Gawai, Kaul Mukah, enggau ke bukai.

MILIH: Tebaloi Layah deka dibagi nitihka pemesai

“Ukai pengawa muntang nangkup peminta ngenyit nambah maya musim pengerami, nya kebuah enda tau enda nyediaka diri tumu nyengkaum penyampau tubuh orang ti gawa.

“Gaya gamal tebalo ti digaga kami segi empat tepat, enggau bemacham chura baka gadung enggau kalas,” ku iya nerang.

“Chara ngelumai enggau ngaga endang muntang enti penyampau utai dikena betul.

“Kala mega raban pemansik nguji ngaga tebaloi tu, semua utai bisi magang tang penyampau ti salah deka ngasuh produk tebaloi enda nyamai.

“Rega kilang meruan RM1.20 lalu sida ti bejual suah agi nyual RM2 sekambut. Rega nyangka deka niki nitihka rega makit ti enda entu tegap.”

“Kami mega bisi meri bekal produk ba Padang Bilun Antarabansa Kuching enggau Padang Bilun Sibu.

Suah agi sida deka ngeletak rega nitihka penau diri empu. Barang dianjung ngena bas lalu semua ungkus pejalai enggau tambang deka dibayar ngagai aku nengah transaksyen bank,” ku iya.

KERAN, PUH GAWA

Fatimah chukup sayauka kilang enti diteju pia aja. Nya kebuah iya kerana mat ngemansangka kilang nya kelimpah ulih nambahka belanja sida sebilik.

Ku iya, kilang tu dikunsi begulai enggau peranak bukai ti bisi ati ngaga produk Tebaloi layah sida empu lalu rega suwa RM10 sekali ngena kilang nya.

Iya mega sedarka rebak diatu nadai entu kiruh nampung pengawa tu ketegal napi pemar ngulihka utai mata.

DIARA: Tebaloi Layah diara atas para lalu api kayu ari baruh para.

Utai dikena ngaga baka inyak, kayu, daun pisang, telu enggau sepur sagu mar digiga laban jarang dijual.

“Enti diri empu deka kiruh begigaka utai tu, pengawa mega deka lantang dikereja. Baka aku empu ngulihka utai tyu ari peranak rumah panjai ba jalai ngagai Bintulu, kayu ba tebing tasik, daun pisang digaga ba sebelah genturung pendiau, sepur sagu, telu enggau utai bukai dibeli ba pasar.

Enti rega utai niki, puku ngepunka dagang mega deka nambah. Taja pia iya netapka penemu diri nyual Tebaloi Layah berega RM1.20 aja, terus ari kilang iya.

PEMATAK DAGANG TEMUAI

Nadai sapa ngadang kilang ngaga Tebaloi Layah tu matak penatai bala temuai enggau sida ti bejalaika pansik.

Kenu ku laki iya Haji Zaffarin, 60, kenyau ari suba sida udah nerima mayuh penatai bala temuai ti deka meda empu dagang ngaga Tebaloi Layah tu.

“Bisi kedua datai ari menua tasik, temuai ari selampur Malaysia mega, tu nyengkaum menua Jepun, China, Brunei, Amerika, Indonesia enggau ke bukai,” ku iya.

Samsiah

Kala mega ejensi dagang temuai betanya ngagai iya enti bisi bala temuai bisi ati datai kia laban gagit meda empu chara ngaga produk tebaloi nya.

Lebuh dirandau Suara Sarawak, iya madah bisi bup rejista nama pengusung ti kala datai kia lalu meri penemu ti manah sentang dagang sida lalu pemadu baru nerima penatai temuai ari menua Nethaland, sampal sepintu bilik.

Ku Samsiah, kelimpah nyungkak ekonomi menua nengah aktiviti dagang temuai, kilang patut diseliti enggau disikap ngena perengka guna ti meruan agi.

NGANDALKA BANTU

Kilang ti udah kelalu tuai, berengkah gawa kenyau ari taun 1970an lalu kepenudi diseliti taun 1990an, napi penanggul ba infrastruktur ti patut diperati enggau dibiki ngambika meruan bediri tegap. Sida buat mega bebendar minta bantu ari raban bekaul nyaup nyeleti kilang nya.

“Kami mega udah ngambar bagi kilang ti udah repuk enggau rusak dikena ngulihka bantu,” ku iya.

Taja pia, nyentuk sehari tu, semua peminta sida lalu bedau ditimbal. Ambika chunto ku iya, agu ba kilang udah lama rusak.

Nya kebuah iya ngarapka raban bekaul malik, berati sereta nyaup mutarka penanggul ditapi sida.

REPUK : Pendiau langkau tebaloi ke patut dikemanah baru.