PAKAN: “Tu mih siti ari chara dikena kami mantu pekebun peranak menua pesisir ditu ti putus penatai belanja laban enda ulih bedaja ke pasar (Tamu) sekumbang pengerekai Covid 19 nyadi,”ku Tedong Chakaw.
Tauke AJ Trully Spices Enterprise nya madahka inisiatif meli sayur ari pekebun nya siti ari chara mantu lalu dianjung ngagai peranak rumah panjaika ti benung ba Atur Mindah Betagang Dipekul (PKPD).
“Aku andal pengawa ngangkatka sayur pekebun mit tu ulih mantu sida nambahka penatai pemisi taja enda ulih nurun bejual ba tamu.
“Pengawa tu mega nerima timbal ke chukup manah ari peranak rumah panjai ti nerima bantu pemakai,” ku iya madah ngagai Suara Sarawak.
Dulu ari nya, Tedung baru udah nganjung bantu barang pemakai ngagai Rumah Empi,Tanjong ditu ti benung PKPD.
Arapka pengawa meli terus sayur ari peranak rumah panjai ulih dititihka tauke-tauke ke bukai.
Nya alai, ngagai raban bukai ke bepemisi lebih agi di Pakan ditu anang enggai ngangkatka sayur ke bisi ditanam peranak rumah panjai dikena mantu sida nambahka penatai,”ku iya.
Ungkup penemu bisi 10 buah rumah panjai ti benung PKPD ditu udah nerima bantu pemakai ari Tedong. Urung 250 ikat sayur ensabi idup enggau iya ke udah dikasam bisi dijual ngagai Tedong kelimpa engkayu bukai baka daun rampu enggau daun changkuk ti berega manggai RM2,000.
