PAKAN: Program pengasih meri bantu barang pemakai ungkup rumah panjai ti kena kuarantin ba pelilih menua Pakan terus dipajak dikena ngelempungka tating penusah sida ke enda ulih mindah ngiga pemakai.
Tedong anak Chakaw 60, ari Rumah Chakaw Sungai Seru Lemujan madah diri naka ulih nulung rayat ti kena kuarantin.
“Pengawa nulung bala di Pakan ti kena kuarantin beduduk ari pengerekai Covid 19 deka dipajak taja pan pengawa tu begunaka ungkus ke besai,”ku iya.
Tedong madah diatu sida ke kuarantin di rumah endang enda ulih mindah. Nya alai, aku berasai sinu ngenang penusah ditapi sida, ku iya.
Tedong madah ka bantu tu mih jalai kena ngemai rayat saum ati ngena chara ngaul diri sebilik lalu ambi ka rayat enda teguran laban timpuh kuarintin.Tu mega ku ia siti chara kena nulung rayat nengah program pengasih.
“Terus jaga pengerai diri sereta titihka SOP nagang pengerekai penyakit tu.
“Terima kasih ngagai raban Opis Pengerai enggau Rela Pakan ti chukup ransing bejalaika pengawa siang enggau malam sekumbang pengerekai Covid 19,” ku iya.
Dulu ari nya, Tedong bisi nganjung barang pemakai ngagai lapan rumah panjai di Pakan iya nya Rh Barang Sungai Empang, Rh Rachak Nyalak Ladong, Rh Akun Supi, Rh Bujang Tebok,Rh Kunjan Buku,Rh Libau Buku,Rh Enchangan,Rh Anding Dayu enggau Rh Jilap Batu 6.
Bisi 263 kambut barang pemakai udah disuaka Tedong nyerumba program pengasih nya.
