ASAJAYA: Siku ular tedung selar 0.5 kaki pemanjai belalai ba dapur sebuah rumah ba Kampung Serpan Laut mujur ditangkap raban Penyaga Orang Periman (APM) Asajaya kemari.

Penerang ari Bilik Ngatur Operasyen APM Asajaya madahka sida nerima kangau telefon ari siku orang periman bekaul enggau penusah nya urung pukul 8.45 pagi.

Pengudah nemu berita nya, raban APM terus nganjung empat iku raban nyaup nangkap ular tedung nya betuaika LKPL (PA) Nurhidayah binti Musa.

“Dulu ari nya, tudah ke ngempu rumah nya balat tekenyit lebuh tepedaka ular tedung nya maya iya mansang ngagai dapur.

“Ketegal irau ati ke pengelikun diri enggau sida sebilik, iya terus betelefon ngagai raban APM minta saup nangkap ular nya,” kenu ku padah Nurhidayah.

Nampung nya, Nurhidayah mega madahka ular tedung nya mujur ditangkap sida ngena chara panjuk.

“Nadai orang diripotka bebadi tauka bakal ba batang tubuh berindik ari penusah nya lalu ular nya dilepaska ba babas enda jauh ari endur nya,” ku tandu iya.