Teju kort ngaga pemutus

KUCHING: Kepala Menteri Datuk Patinggi Abang Johari Tun Openg andalka kort ulih mai kes saman Perintah Sarawak nentuka pemutus ti betul.

Ku iya, pekara bekaul enggau kes nya deka diserah ngagai kort dalam nentuka pemutus kes nya.

“Kami chukup andalka kes tu, lalu semua diserah ngagai kort magang.

“Tu siti sejarah ngagai Konstitusyen Perintah Besai sereta hak kitai ba baruh Konstitusyen Nengeri,” ku iya.

Iya madah munyi nya ba aum pemberita pengudah ngetuaika aum Komiti Besai Gerempung Parti Sarawak (GPS) ba Indu Opis Parti Pesaka Bumiputera Bersatu (PBB) ditu, kemari.

Dulu ari nya, Perintah Sarawak mansutka saman ngagai Petronas berindik ari pengenggai kompeni nya mayar chukai nyual produk petroleum ke digiga ba nengeri tu.

Saman nya dipansutka Perintah Sarawak pengudah Petronas ditemu enda nitihka atur dalam Ordinan Cukai Jualan Negeri 1998.

Petronas ti enda mayar chukai nyual nya diberi penalti lebih RM1.3 bilion dibandingka enggau kompeni bukai.

Bela datai ba aum nya Sapit Kepala Menteri Datuk Amar Douglas Uggah Embas, Tan Sri James Jemut Masing enggau Datuk Amar Awang Tengah Ali Hasan, Menteri Kaunsil Kandang Menua enggau Pengawa Berumah Datuk Sim Kui Hian, Kaban Parlimen Bintulu Datuk Seri Tiong King Sing enggau Sapit Chairman PBB Pampang Satok Datuk Ibrahim Baki.

Suara Sarawak