Teju Muhyiddin nyadi menteri besai

KUCHING: Menua diatu begunaka perintah ti tegap dalam mutarka penanggul pengerekai igi penyakit Covid-19 enggau ekonomi.

Kepala Menteri Datuk Patinggi Abang Johari Tun Openg madahka iya enggai kiruhka penyarut pasal chalun nyiri Menteri Besai ti nyadi ba Semenanjung.

“Ditu kitai kiruhka pekara pemansang, lalu ba penemu aku pekara pasal Menteri Besai nya pekara ti kedua.

“Nadai kebuah deka berebut, teju ngagai Muhyiddin (Tan Sri Muhyiddin Yassin) laban iya udah duduk ba penuduk nya diatu,” ku iya.

Iya bejaku munyi nya lebuh ditanya pemberita maya bejadika Program Nasih Tanah Projek Jalai Sungai Sungai Maong ke Segedup ditu, kemari.

Iya madahka, pekara ngemansangka nengeri ngambika rayat likun sereta bulih pengelantang enda ngira sida ti diau ba mengeri enggau menua pesisir deka terus dikereja.

Kelimpah ari nya, lebuh ditanya sentang mansik baru agih belanja lima buah jematan ti dikinsilka Perintah Besai maya perintah Pakatan Harapan (PH) bekuasa ke diteruska Perintah Sarawak, iya madahka pekara nya enda ibuh dipansik agi.

Ku iya, Perintah Sarawak komited neruska projek nya ngena belanja menua tu empu.

“Enti dipansik baru, projek nya deka majak laun agi tembu.

“Enda ibuh dipansik agi, laban perintah endang komited deka neruska projek nya ngena belanja kitai empu,” ku iya.

Ku iya, ba Langgur Pemansang Malaysia Lumpar ke-12 (RMK12) sekeda projek ti dilanggur sida bisi ba baruh Perintah Besai.

“Nyadi kitai ulih minta agih belanja mayuh agi ngagai Perintah Besai ba projek bukai laban projek tu (lima jematan) udah diambi kitai,” ku iya.