Teju ngagai raban landik undang-undang ngaga pemutus

KUCHING: Penemu nyerahka pemutus ngagai orang ke endang tebangkar ba undang-undang dalam nentukan reti ke engkeman dikena ngaku Sarawak endang pemutus ke betul, ku Tuai Pemadah Parti Pesaka Bumiputera Bersatu (PBB) Datuk Idris Buang.

Adun Muara Tuang nya madah ngagai New Sarawak Tribune kemari, sekalika leka jaku ke dikena nya’wilayah’ tauka ‘nengeri’, iya ngelalau Kepala Menteri Datuk Patinggi Abang Johari Tun Openg nejuka aja pekara nya ngagai orang ke tebangkar ba undang-undang berati dulu.

“Aku ngasai penemu nya endang atur ke betul.

“Taja pia, leka jaku mesti dikena nitihka engkeman sama enggau pekara ditanggam dalam Sempekat Malaysia 1963 (MA63) sereta dokumen ke bekaul,” ku iya.

Kena 10 April, Abang Johari madah Perintah Sarawak deka nyerahka pekara nya ngagai orang tebangkar undang-undang nentuka leka jaku ke amat dikena ungkup Sarawak, sekali nya ‘wilayah’ tauka nengeri.

“Leka jaku wilayah iya nya perambu penemu Menteri Besai Tan Sri Muhyiddin Yassin. Nyema orang deka ngangauka kitai wilayah, kitai semina nerima.

“Tang reti ke amat, tejuka dulu orang ke landik nentuka iya. Kami diatu agi berundingka MA63,” ku iya maya aum pemberita pengudah bejadika pengawa nasih tanah Stadium Mini Balai Ringin.

Suara Sarawak