Tekad Ai Bakun deka dililih berengkah 23 Disember tu

KUCHING: Sarawak Energy Berhad (SEB) deka ngelilihka ai bemusin ari palan ngandang ai Bakun berengkah ari 23 Disember tu.

Nitihka penerang ari SEB sehari tu, pengawa nya dipejalai pengelama lima minggu, nyentuk ai dia manggai ba tikas normal.

Nya alai, sekumbang timpuh nya, penyampau ai dililih deka dipatau ngambi ai ngandang di ulu sebela enggau tikas ai sungai ari ili dikena ngurangka empas tunga kili.

“Peningi tikas ai sungai enggau intensiti ai ke dililih deka bekurang lebuh takah nambah seraya ai tunga kili tekat ai ulih niki ngagai tikas enda ulih ditaga.

“Ambika chunto, sehari udah ai dililih disadang ngasuh ai besai ba Pasar Kapit lalu tiga hari udah nya datai ba Pasar Sibu.

“Bah mega tau nyadi laban hari ujan bangat tunga kili, ai tasik pasang raya kelimpah ai ke datai ari anak sungai di Batang Rajang.

“Pengawa tu ila deka dipatau SEB empu laban kitai naka ulih nyeliahka penusah bah ba kandang menua endur ai tu pansut,” tambah penerang nya.

Ke penerang, tu atur kereja standard ngintu kuasa ai selampur dunya lalu udah dikereja sida di Bakun kenyau ari taun 2010 suba.