KUCHING: Sarawak Energy beempu pangku pengawa besai nangkup peminta kuasa ti majak nambah lalu dipejalai nengah pemansang stesyen tekat ai Baleh 1,285MW ti dipelaba berengkah beoperasyen ba taun 2027.
Premier Sarawak, Datuk Patinggi Tan Sri Abang Johari Tun Openg madah, kuasa ulih dikemaru udah nukang ke peluang ngagai Sarawak ngemansang projek besambung enggau bakih serantau dikena ngemansangka Grid Borneo enggau eksport kuasa ti keterubah ngagai Kalimantan Barat ba taun 2016.
Projek tu udah meri pengelebih projek besambung nentuka pemujur projek dua menua seraya terus ngemansangka Grid Borneo enggau Sarawak enda lama enggau Grid Kuasa ASEAN.
“Sarawak Energy beempu pangku pengawa besai nyadi kuasa besai serantau ungkup kuasa ulih dikemaru dalam Strategi Pemansang Pengudah COVID-19 2030.
“Diatu, kitai pemansut kuasa ulih dikemaru pemadu besai di Malaysia lalu meri perati ba kuasa hidro ulih dikemaru dipejalai Sarawak Energy ba baruh bidang kuasa Opis Menteri Utiliti enggau Telekomunikasyen Sarawak.
“Nengah pemansang kuasa hidro ulih dikemaru, kitai ulih negapka ekonomi rama Sarawak ke alai kuasa hidro nyadi pemungkal Koridor Kuasa Ulih Dikemaru Sarawak (SCORE),” terang iya.
Abang Johari mega madah,k SCORE ngemerat pengelebih Sarawak nyadi palan strategik ba pemansut kuasa enggau rega ti patut sereta ulih besemekih ba tikas dunya, matak penguna kuasa intensif ba Sarawak dikena nyendiaka pengawa puang enggau pengaya nyentuk Sarawak ulih nyadi palan besai beranakka puku ba Asia Tenggara.
Sarawak bisi pengulih besai nyadi ‘Bateri’ ASEAN ungkup pemansang stesyen pemansut hidro Mentarang Induk 1,375MW di Kalimantan Utara ke alai pengawa nasih tanah udah diatur kena 1 March 2023.
Sarawak naka ulih ngemujur projek besambung nyadi sebengkah kerejasama ti deka negapka penuduk Sarawak nyadi kuasa besai serantau ungkup kuasa ulih dikemaru sereta nyukung pengawa ngalih ngagai kuasa baru di menua tu enggau sitak serantau.
Minggu nyin tadi, Abang Johari udah ngelanchar Chitose Carbon Capture Central Sarawak nya sebuah fasiliti nangkap karbon lukut keterubah ba Sarawak enggau epmadu besai di Malaysia ke alai sistem pemansut setengah betutup dikena ungkup pemansut lukut.
Abang Johari mega udah bejadi stesyen Solar Hibrid Long San minggu nyin tadi ke mega stesyen solar hibrid keterubah ba Sarawak ngena bateri Lithium-Ion ti maju enggau ngena kuasa ulih dikemaru sereta ngurangka pengawa bepanggai ba minyak diesel ti mar rega. – BMKK JAPEN SARAWAK.
