PEMINTA tinggi ba makit laban ditemu mayuh guna ngasuh techal engkabang entara produk rumah panjai ti chukup berega.

Richie Anak Jerome tauka tampak agi dikelala enggau nama Richie Mikai ari Rumah Benar, Nanga Lipus di Kanowit madahka dagang techal engkabang diri semampai laku.

Ku iya, produk pemakai asal kitai Iban nya endang jarang bisi tauka dijual enti ukai musin iya.

“Tambah diatu nyau mayuh orang udah nemu guna techal engkabang kitai tu kelebih agi kena ngulai enggau nyumai bemacham bansa pemakai.

“Enti suba, chal ba asi angat aja ti ditemu kitai. Diatu, kena sida ngirau asi, nguring sayur, nyumai manuk, kena ngaga asi lemak meh nya enggau mayuh ke bukai.

“Techal engkabang tu tau dikumbai kitai mentega tauka butter ku orang ribai ti nyamai kena ngulai pemakai,” ku iya lebuh dirandau Suara Sarawak.

Igat Richie madah, bisi mega orang ti landik lalu ngaga inovasyen ba techal tauka minyak engkabang baka digaga produk penganta, produk kulit sereta mega sabun.

Ari pansik ti udah dipejalai orang ti anda tetemuka minyak engkabang ngundan Vitamin E, A enggau C ti tinggi.

“Ketetiga vitamin tu tadi endang ditemu manahka pengerai kulit enggau tubuh sereta dipechaya ulih nyadi petua lubah tuai (anti penuaan).

“Kulit lubah ngeriut, semampai lis enggau pepelu deka ngasuh mua kitai dipeda berupai biak belama.

“Kelimpah ari nya, minyak engkabang tu mega nyadi minyak urut enggau digagaka produk penganta baka kena mua, losyen tubuh enggau enselup,” terang iya.

Berindik ari nya, Richie enggai masau pengulih besai engkabang lalu ransing ngerembaika dagang techal engkabang kelimpah ari produk kraf jari.

Ba penemu iya, pemisi rentayan dagang digital udah meri pengelebih ngagai sida serumah nyual enggau ngelakuka produk rumah panjai.

“Aku tau disebutka ngerandang jalai ngiga belanja ke kami serumah kelebih agi sekumbang pandemik nuntung menua kitai ti ngasuh mayuh pengawa tejanggal enggau mar deka mindah. ‘

“Ari nya tadi, aku teulihka runding muka dagang nengah tali arus, ngelaku enggau ngiga orang ke meli ti ukai semina datai ari peranak menua tu aja.

“Munyika bula nusi, indah orang ba menua tasik din pan ulih ngudar techal engkabang ari pemisi teknologi baru tu. Utai dijual ulih dikirum ngena pos tauka kapal.

“Semua pengawa ba ujung jari aja diatu, nadai utai enda ulih dikereja, tulang aja ditanya. Suba kitai semina nemu bedaja sebelah tamu.

“Tu meh siti ari pemansang runding nerima ubah enggau pemansang dagang dunya kemaya hari lalu kitai patut berubah ngagai pengawa ke manah,” ku iya mantaika sadang penemu diri.

Besai pengandal Richie ngagai mensia mayuh meri sukung ngagai dagang ti dipunka iya kenyau ari taun 2019 suba.

“Tu chara kena kitai nulung orang rumah panjai ngiga belanja lalu meransang raban nembiak enda belelang jauh ke mengeri besai ngiga kereja.

“Ukai semina techal engkabang aja, mayuh produk kraf jari bukai dijual kami serumah baka sintung, raga, selabit, timpa, tanggi, belanyat enggau mayuh ke bukai.

“Rega produk dijual kami mega ulih ditangkup semua. Ambika chunto baka rega techal engkabang tu semina RM15 seluntang, nitihka rega makit.

“Semua produk rumah panjai tu tau dipeda bala kita nengah Facebook aku, Richie Mikai lalu kita tau betanya nuju lumur Whatsapps (0198261148) sereta Tiktok (@richiemikai),” ku Richie nyimpul randau.