KUCHING: Perintah Sarawak benung ngerandang alternatif ngaga rumah tauka begunan ngena chara kunteriktor besai chelak 3D (giant construction 3D printers).
Premier Sarawak, Datuk Patinggi Tan Sri Abang Johari Tun Openg madah, menua tu andal deka ngembuan mayuh chara bukai bekaul pengawa berumah enggau ngaga begunan.
“Aku udah nganjung seraban tim serikat kunteriktor ba baruh Kaunsil Pemansang Ekonomi Sarawak (SEDC) ngagai China dikena belajar teknologi baru baka pengawa nyelak 3D ngaga rumah.
“Rumah bechelak 3D tu ulih tembu dalam timpuh lima minit lalu nengah teknologi baru tu, kitai ulih ngurang pengawa bepanggai ba pengereja pengawa kunterik,” ku iya.
Abang Johari mansutka jaku nya rambau Program Sumbangsih Raya 2023 ba Wisma Bapa Malaysia ditu, kemari.
Lebuh dirandau pemberita bekaul pekara nya, iya madah, alternatif nyelak 3D nya ukai semina jampat dikenangaga rumah tauka begunan tang ulih ngurang ungkus belanja.
“Taja pia, pekara ti pemadu beguna iya nya kitai ulih nguasa teknologi lalu ulih ngaul diri ba industri pengawa berumah ti deka dibayar besai.
“Tu meh dikumbai ekonomi bepenatai pemisi tinggi ngena teknologi pemadu baru,” ku iya.
Ungkup penerang, industri kunteriktor nyelak 3D ulih dikena ngaga komponen berumah tauka nyelak semua langkar begunan nyentuk tembu.
Sekeda pemaik ngena chara nyelak 3D nya baka mantu ngelimat awak, ngurang laluh kereban dikena berumah enggau ngurang pengilap mensia ba sektor nya.
