ARTIKEL

Teknologi dron seraris visyen Premier Sarawak

Facebook
Twitter
LinkedIn
WhatsApp
Telegram

“APLIKASYEN khas ngaul dron khas tu dikemansang menua Jipun ti nyadi sebagi ari inovasyen ngambi dikunsi kitai begulai napi ubah dibai segang pemansang dunya dudi hari.

“Ari sukut penerang diulih kitai nengah dron iya nya stok karbon lalu pemadu beguna, kitai ulih melabaka isi karbon ba pengawa ngatur karbon.

“Tu nipakka visyen ekonomi baru enggau ekonomi digital ti ditibak ari penemu enggau ditegika Premier Sarawak, Datuk Patinggi Tan Sri Abang Johari Tun Openg.

“KSC nyukung Perintah Sarawak nyapai juluk nuju ekonomi gadung ba nengeri tu lalu angkat nyadi nengeri maju bepenatai pemisi tinggi manggai taun 2030 nengah Strategi Pemansang Udah COVID-19 (PCDS 2030) ti udah dilanchar.

“Sarawak chukup betuah laban bisi mayuh pemansut kuasa ke ulih dikena baru enggau nyaup nyaga pemeruan rampa menua bekenaka teknologi baka dron,” ku CEO KSC, Novert Sullang Datuk Douglas Sullang. 

BA tusun dulu ari tu, kitai udah meda pemujur Kuching Skills College (KSC) meri latih ngagai raban ti udah dibuai kereja tauka putus pengawa ketegal pengerekai Pandemik COVID-19 ngambi sida bisi peluang ngaul diri ba sektor bekaul.

Nyadi tusun sekali tu, kitai deka ngenang lenak agi pengeran raban pengatur pengawa enggau pengajar ba palan pelajar pengelandik nya ngajar rebak biak chara bekenaka teknologi baru nya.

Sedar ke pemesai guna enggau pengulih teknologi dron dudi hari, dia raban KSC bejalaika inisiatif narak enggau nyukung pengawa bekenaka teknologi nya ari renggat tumu.

Tuai Pegawai Eksekutif (CEO) KSC, Novert Sullang Datuk Douglas Sullang madah, pengawa nya beguna amat ngambi sida sedar ke pemesai guna nyaga rampa menua enggau nangkup peminta makit kereja dudi hari.

“Kami ba KSC endang naka ulih ngena peluang ke bisi marit mayuh agi bala nembiak rindu ke teknologi baru nipakka juluk Opis Menteri Pelajar, Inovasyen enggau Pemansang Bakat Sarawak ti deka nempa nembiak landik enggau bepenau.

“Nya alai, kami ukai semina nyendiaka kus tauka latih ngagai rebak besai tuai aja ngena teknologi tang ngaul raban nembiak ari renggat tumu kelebih agi sida ke agi besekula ngambi dilatih chara ngena dron.

“Lalu pengawa tu begunaka sukung tegut enggau kerejasama semua raban nyengkaum bala nembiak nya empu, apai indai, bala pengajar, raban sekula sereta komuniti mayuh.

“Pekara tu mega beguna amat nentuka juluk perintah nyaga pemeruan rampa menua gadung nengah teknologi baru deka ulih dijapai lalu meri pemaik ngagai semua,” ku iya nampung randau.

PEKIT NGENA PENAU

Ari nya tadi ku Novert, dia Pekit Drone Challenge MSS Sekondari Bagi Menua Serian 2023 udah diatur dikena ngemujurka tuju enggau juluk nya.

Opis Menteri Pelajar Malaysia (KPM) nengah Sekula Sekondari (SMK) Padawan nyadi raban pengatur pekit udah milih siku ari pengajar Kus Teknologi Dron KSC, Seth Peli, nyadi siku ari akim ba pekit nya.

Pekit ke udah mujur ngempuruka bala nembiak ari sekula sekondari ke bisi ba bagi menua nya ke alai gelar champion enggau lumur dua diempu nembiak ari SMK Siburan seraya ketiga penggi SMK Tarat.

Baca lain  Covid-19: 536 kes baru, tujuh bebadi nyawa di Sarawak

“Bala nembiak ulih belajar ke Sains, Teknologi, Injiniring enggau Matematik (STEM) ba renggat sekula lalu penemu ke dipelajar ulih dikena tauka dikemeran ba pengidup.

“Ari nguasa STEM nya tadi, sida mega ulih belajar enggau nyerungkai teknologi baru ti majak diguna orang kelebih agi raban industri kemaya hari tu laban menua benung nyingkang nuju menua gadung.

“Pekit bepelasar ke pengulih teknologi dron tu endang meransang bakat baru ari raban nembiak kelebih agi nembiak sekula ngaul diri ba STEM lalu nyerungkai teknologi pemadu baru kenyau ari umur biak.

“Ni nemu, maya sida udah besai ila, mayuh pengawa ngena dron tu baka ba sektor industri kampung, industri pemansang kayu ramu, industri betanam betupi, industri karbon enggau hidrogen sereta industri bukai ke bekaul, dia bisi udah bisi penemu pemun pasal teknologi tu.

“Kebuah pia laban sida udah kala belajar chara ngena teknologi dron lalu bisi peneleba nerebaika dron nya empu lebuh agi besekula suba.

Tu pengelebih sida ti ulih nangkup peminta industri nya,” ku iya madah nyemetak.

PELUANG BESAI

Kereja ba industri tu chukup besai ke alai rebak biak nya ukai semina ulih nyadi operator enggau pengatur chara aplikasyen dron, penganalisa data tang sida mega bisi pengulih nyadi pelumba dron profesional ti ulih ngarika menua ngagai tikas antarabansa.

Nambah ke nya, ku Novert, kitai udah nerima berita ke chukup manah enggau peluang besai ngagai bala nembiak ke patut direbut ari inisiatif dipejalai Perintah Sarawak.

“Sarawak merambu nganjung nembiak ke Norway ngambi belajarka pengawa nangkap enggau nyimpan karbon (CCS) lalu tu peluang besai bala nembiak ngerembaika penau diri ba pengawa ngaul teknologi.

“Premier Sarawak madahka tuju nganjung anak Sarawak ngagai palan pelajar din ngambi ulih nempa mayuh agi orang ti anda tauka pakar ba sektor nya.

“Kebuah pia laban Sarawak enggau Norway ngembuan sinergi ari sukut ngeluar enggau pemansut ekonomi dikena mansutka kuasa hidro sereta minyak enggau gas.

“Nya alai, ku penemu Abang Johari, menua kitai endang patut nganjung nembiak kitai kin ngambi sida ulih belajar enggau silik pasal chara nambahka teknologi CCS,” ku iya lalu tuchum.

Ari sukut teknologi, ku Novert, Norway endang chukup maju lalu Sarawak sebuah menua benung mansang nuju ekonomi gadung bepelasar ke teknologi.

Pengawa nganjung nembiak belajar kin mega ukai dikereja sengapa tang sida nya patut nguasa jaku English lalu deka bisi peluang belajar ke jaku Norwegia maya belajar din ila.

Premier empu udah meri jamin Duta Malaysia ba menua nyin deka ngiga palan pelajar ke engkeman ungkup bala nembiak bejalai ngiga penemu enggau peneleba.

“Teknologi dron tu siti ari chabang penemu teknologi baru ti diguna ba pemansang pengawa nangkap enggau nyimpan karbon (CCS) ti deka dipejalai ba Sarawak dudi hari.

Baca lain  Celestine Ayie ransing merindang peminat

“Peluang tu meh ke patut diining bala nembiak kitai.

Apai indai enggau bala pengajar patut ransing agi marit nembiak ngambi rindu belajar ke STEM.

“Ni nemu, nembiak ari sekula kita dipilih perintah dianjung belajar ke Norway ila, tentu pekara tu pulai ke pemanah enggau penguntung ngagai kitai semua,” ku iya nyemetak.

EMPAS TEKNOLOGI

Pejalai nuju menua maju enggau bepenatai pemisi tinggi manggai taun 2030, dia Sarawak begunaka rayat ngubah runding ngambi ngalih ngagai ekonomi gadung ti enda ngeruga pemeruan rampa menua.

Ari nya tadi, ku Novert, kitai endang begunaka teknologi pemadu baru kelebih agi ngamatka tuju Premier Sarawak ti deka meda kurang karbon dilepas, karbon ditangkap lalu disimpan sebedau ‘disuntik’ nyadi utai bukai.

Nyadi menua mansang baka Jipun enggau Amerika Syarikat, pemeruan rampa menua enda ulih ‘dipenyati’ kitai pia aja laban pemeruan rampa menua mega meri ‘pengidup’ ngagai menua.

“Sistem ngatur rampa menua ti meruan begunaka polisi ti nyengala dikena mutar penanggul rampa menua enggau meruan lalu bisi atur nagang ti ngasi.

“Dikena mantu ngaga polisi rampa menua ti nyengala enggau ngasi, dia bemacham chara, teori enggau kereban nyengkaum teknologi baka dron tu ulih dikemansang enggau dikena.

“Ambi ke chunto, pengawa ngumpul data ti manah, sistem bekunsika penerang chara bepalan enggau pemansang inovasyen pemadu baru dikena nagang pengamah enggau ngerembaika penerang ngambi ulih nyeridi komuniti.

“Semua tu begunaka sukung enggau transformasyen digital ba pengawa ngatur rampa menua ti meruan kelebih agi diatu kitai betapi enggau ubah klimet ti berasai endar nyentuk bisi nyawa bebadi enggau ngerusak reta tengkira, infrastruktur enggau ngeruga produktiviti ekonomi menua,” terang Novert.

NGUBAH SINGKANG

Ba taun 2014, Intergovernmental Panel on Climate Change (IPCC) nela ubah klimet ngeruga dunya baka tikas ai tasik niki, gaya hari enda tentu, bekal utai tanam enggau ikan majak kusut sereta bemacham bio deka punas.

Kitai ba Sarawak dipeda sesingkang dulu lebuh randau begulai enggau Petroleum Sarawak Berhad (PETROS) deka diatur ngambi ngelala taba ke engkeman ungkup inisiatif numbuh ke CCS baka ti dipadahka Abang Johari ensanus.

“Pengawa ngelala taba tu ulih digiga nengah tungkap khas lalu kitai ngandalka teknologi dron deka dikena lalu meri asil ti engkeman ba tungkap nya ila.

“Kitai bisi pengandal laban iya (Abang Johari) madahka pekara pemadu beguna iya nya polisi ngambi kitai ulih ngena pengelebih geologi kitai (Sarawak) dikena nyimpan karbon.

“Taja pekara nya ukai muntang dikereja tang menua kitai bisi pengelebih ari sukut struktur geologi tanah kitai ti ulih ditimpai ari langit enggau data dikumpul ari bekenaka teknologi dron tu,” ku Novert andal.

Abang Johari bisi nyebut pasal serikat pengatur CCS ti udah dilawa sida ba menua nya mega deka diangkat nyadi malin lalu dikena beratika tikas ba pemansang sektor gadung ba Sarawak.

Pekara nya ku Novert mai reti chukup besai enggau ngerandang mayuh agi peluang ti ulih direbut bala nembiak rebak dudi ba pemansang menua ke meruan agi.

Baca lain  Inovasyen baru Batik Linut

“Pengelebih teknologi tu patut dikemeran enggau dikena ngatur rampa menua gadung seraris enggau pengidup chara baru lalu nyadi peluang ke manah dikerembai.

“Udah datai ba maya ke patut pemansang pansik inovasyen nuju pengawa bekenaka digital ba sistem matau enggau ngumpul data bekaul tikas ai, angin enggau tanah dipejalai lalu pengawa tu meseti ditarak ari renggat tumu baka ba STEM.

“Bala nembiak tu ila deka ulih enggau nemu nyerenih data ti patut dikoordinasyen, dianalisis enggau dipadah ngagai komuniti pasal gaya utai ke nyadi.

“Tu deka ulih mantu raban bekuasa perintah lokal enggau ejensi menggi pangku pengawa bejalaika atur enggau jampat enti sema bisi sebarang kes ngamah nyadi.

“Nya kebuah ari tadi aku nandu, teknologi dron tu endang beguna ba semua sektor bekaul lalu penemu enggau pengelandik ngena teknologi tu chukup mayuh.

“Enti kitai berati, nembiak ti diajar ari umur biak deka jampat nangkap utai dipelajar sida lalu ngena penemu ba runding enggau pengawa ti deka dikereja.

“Reti utai ku aku, bala nembiak ti ngambi pelajar STEM enggau bisi penemu pemun pasal teknologi dron deka nemu berundingka sistem pengatur rampa menua ti meruan jemah.

“Nentuka pengawa nya bisi asil, dia opis Menteri bekaul patut ngaul raban palan pelajar tinggi menua tu, ejensi bekaul enggau raban perintah lokal.

“Taja bisi sekeda pengawa ti dipunka raban penungkap ba palan pelajar tinggi enggau ejensi, tang apin chukup lalu agi empai mayuh nitih ke geran ti diterima.

“Nya alai aku ngarapka bisi geran disedia ungkup nembiak, enti ulih ari renggat sekula primari dikena raban sekula ngatur pengawa bekaul teknologi dron enggau pelajar rampa menua,” ku sadang penemu iya.

BEGUNAKA MEKANISME

Pemansang teknologi pemadu baru baka dron dikena ngintu rampa menua tu deka ngerandang mayuh agi peluang ngagai pengereja menua ba pengawa pemansang teknologi digital, orang dagang teknologi, bioteknologi enggau ke bukai ti dikearap dalam Revolusyen Industri 4.0.

Ku Novert nampung baru kenang, kerejasama rat bekunsika penemu pakar ari palan pelajar tinggi menua, ejensi bekaul enggau raban perintah lokal deka meri pemaik ngagai semua komuniti ungkup pemeruan rampa menua kelebih agi ba menua kitai Tanah Kenyalang.

“Pelajar ti semampai ditarak pasal nyaga rampa menua ngena teknologi baru deka meri asil ke manah.

“Kes COVID-19 nyadi chunto pemadu manah ke alai penerang enggau pelajar ti semampai ditarak nengah media rama enggau bemacham pelasar udah mujur mai komuniti sedarka pemesai guna nyaga pemeresi.

“Baka nya mega ba pengawa nyaga pemeruan rampa menua tu enda tau enda ditarak ari renggat tumu kelebih agi rebak biak nengah pelajar ngambi sida masai ninga enggau meretika tuju pekara nya,” ku Novert netak dulu kenang ba tusun sekali tu. 

BERITA LAIN

Tim Segak FC nyulut

KUCHING: Tim Segak FC mujur ngempu gelar champion ba Pekit Main Bol Empat Penjuru Trofi Segak FC 2024. Tim ti mayuh dipilih nya mujur ngalahka

Kelas ngajat deka diatur enda lama agi

SAMARAHAN: Serakup Dayak Bukit Kelingkang (DBK) Pampang Melikin begulai enggau Kebudayaan Dayak Bumi Kenyalang (KDBK) deka ngatur Kelas Ngajat Renggat Ke-14 ba Samarahan enggau Serian.

BERITA TERBARU