Trending

Teknologi moden mutar penanggul uras

Facebook
Twitter
WhatsApp
Telegram
E-mel

BETONG: Pengawa mutar penanggul uras ngena teknologi moden kelebih agi ba menua pesisir meseti dipansik dikena nyeliahka uras terus dibuai ngagai palan nunu uras ti ngeruga rampa menua.

Sapit Premier Sarawak, Datuk Amar Douglas Uggah Embas madah, sistem ke diatu baka uras terus dibuai ngagai palan nunu uras nya chara ti udah chukup lama.

“Kitai beguna ke chara bukai, aku deka berandau enggau pengari rayat enggau mega Premier Sarawak, Datuk Patinggi Tan Sri Abang Johari Tun Openg berindik ari uras majak nambah.

“Udah datai maya kitai berati ke teknologi ti ulih dikena ba menua pesisir ba pengawa mutar penanggul uras kelebih agi uras ti enda ulih dikena baru.

“Kami merambu kaban kaunsil ngaga pansik ngambi ulih nentu uras dibuai chara moden enggau enda ngeruga rampa menua dipejalai ba menua tu,” terang iya.

Adun Bukit Saban nibar jaku nya pengudah ngemata Pengawa Angkat Sumpah Kaban Kaunsil Pelilih Betong (MDB) Sesyen 1 April 2023 – 31 March 2025 di Opis Residen Bagi Menua Betong, kemari.

Ku iya, perambu mega nyengkaum pengawa nyendia fasiliti ngaduka uras ti ulih dikunsi mayuh kaunsil pelilih.

“Ambi ke chunto, kitai numbuhka fasiliti tu ba Betong tang ulih dikena kaunsil pelilih bukai baka Saratok, Lubok Antu enggau Sri Aman.

“Aku chukup beratka isu pemeresi enggau rampa menua laban kitai agi nerima sebana ari rayat.

“Reti ku aku tu, aku netapka tagit sitak ba baruh Kaunsil Pelilih Betong (MDB) nyadi palan pemadu beresi ba menua tu” terang iya.

Pia mega, Uggah deka ke Opis Menteri Pengerai Mensia Mayuh, Pengawa Berumah enggau Perintah Lokal beratika pengawa ngagihka besai belanja ungkup kaunsil pelilih bejalaika tanggungpengawa sida kelebih agi nyendiaka servis ngumpul uras ba mayuh agi sitak.

“Nitih ke penerang ba renggat MDB, kaunsilor dibagi ngagai beberapa zon, aku merambu ngatur pekit pemeresi nitih zon.

“Pekit tu meseti nyadi sebagi ari chara suah agi matau sereta narak mensia mayuh enda muai uras sengapa alai lalu ngemujur aktiviti ngena baru uras.

“Enti mensia mayuh ulih meri kerejasama, tagit ulih dikemujur,” ku iya. Dulu ari nya, bisi mega diatur pengawa angkat sumpah 32 kaban MDB betuai ke Pegawai Pelilih Betong ke mega Chairman, Alfred Geling Ason.

Sama datai Sapit Menteri Nembiak, Lumba enggau Pemansang Orang Dagang, Datuk Gerald Rentap Jabu, Kaban Parlimen Betong Dr Richard Rapu, Residen Bagi Menua Betong Richard Michael Abunawas, pengari Opis Menteri Pengerai Mensia Mayuh, Pengawa Berumah enggau Perintah Lokal, Tan Chee Kang enggau Sekretari MDB, Charlie Keling.

Suka artikel:

e-Akhbar Suara Sarawak

Berita Berkaitan

E-Paper

27 November 2023

Berita Terbaru