ARTIKEL

‘Telai Pengerindu’ ari Mrs Global Asian 2023, Kimi Tomas mantai penyelai Borneo

Facebook
Twitter
LinkedIn
WhatsApp
Telegram

NAMA Kimi Tomas majak dikelala mensia mayuh kelebih agi ba selampur Malaysia pengudah iya champion Pekit Mrs Global Asian 2023.

Iya meh indu Iban keterubah champion ba pekit antarabansa nya lalu udah tentu iya balat ngemegahka bansa Dayak kelebih agi bansa Iban empu.

Mrs Global Asian 2023 nya diatu ngaga pemutus berani nyingkang ke kaki ba dunya pemerindang nengah lagu single keterubah iya ti pejuluk Telai Pengerindu.

Lagu ti mantaika pengelala Borneo nya mujur dikeluarka ba pelasar YouTube Kaban Music Production (KMP) kena 27 Oktober tu tadi.

Naka diatu, lagu Telai Pengerindu nya mujur dipeda ba penyuah lebih 30,000 kali enggau nerima kelai like lebih 2,000 ari mensia mayuh.

Ukai naka nya aja, empai lama, Kimi mega bela ngeluarka lagu sebaka ungkup versyen jaku Melayu ti pejuluk Bisikan Cinta.

Kimi madah, versyen jaku Iban sigi dikeluarka iya dulu ngambi jaku nya tampak agi dikelala mensia mayuh ti disempulang tiun sape.

“Lagu Telai Pengerindu tu ngelai penyayau aku ngagai bansa Iban lalu lagu tu chukup semak ba ati aku pengudah dipadu nyadi Mrs Global Asian 2023,” ku iya.

MANTAI PENGELALA BORNEO
Lagu ti ditengkebang Jonez Mackean sereta diseruri Tam Cobain nya ngembuan penyelai kediri empu laban ngemeratka tiun sape ba lagu nya.

Ungkup penerang, Tam Cobain siku komposer tebangkar nama ti bekerejasama enggau penanyi lumur satu Malaysia iya nya Datuk Siti Nurhaliza sereta Alif Satar.

Lebuh dirandau senentang lagu nya, Kimi madah, iya sigi ngemeratka tiun sape ba lagu nya ngambi mantaika pengelala tauka identiti Borneo.

“Aku deka nerus ke legasi muzik tradisional kitai iya nya sape ngambi dikelala mensia mayuh ukai semina ba menua tu empu tang ba renggat antarabansa.

“Pia mega, aku ngarap rebak biak ngembuan minat sereta masa penyelai, pemanah enggau pengaya muzik tradisional bansa diri.

“Nengah lagu tu, aku ngarap muzik Borneo tu enggau jaku Iban majak dikelala sereta didinga ba serata dunya,” ku iya.

Sape ti dikena iya ba lagu nya endang digaga khas petunggal iya empu iya nya Ericson Jawi.

Nangkan nya, iya madah, bunyi sape ngembuan penyelai kediri empu enda nyalah baka angin chelap bepuput lundai meri pengering, pengeregas enggau pengelantang baru kelimpah nyelapka tangkai ati.

Langkar tengkebang enggau ukir sape mandangka siti ari penyelai ti bisi ba Borneo kelebih agi ba Sarawak.

Kimi ngaku diri gaga laban mujur ngelanchar lagu single keterubah diri lalu lagu nya ulih didinga nengah mayuh pelasar digital baka YouTube, Spotify, iTunes, KKBOX sereta stesyen radio Cats.fm enggau Radio Televisyen Malaysia (RTM) Wai.fm.

NGAMPUNG PUPU BANSA
Lagu Telai Pengerindu tauka Bisikan Cinta nya dikerinduka semua orang nyengkaum bansa Melayu, China enggau India ari Semenanjung Malaysia kelebih agi bansa Dayak tauka Iban.

Kelimpah landik nyadaka lagu nya, sida mega nemu reti lagu nya sereta berengkah labuh pengerindu ngagai penyelai enggau pemanah tiun sape.

Nya alai, Kimi pechaya lagu ulih nyadi pelasar dikena ngempung pupu bansa enggau etnik ba menua tu taja ngembuan penatai sereta gaya idup ti bebida.

“Aku ngarap mensia mayuh ngaku muzik tradisional Borneo lalu pemadu beguna seruran ngidupka baru muzik tradisonal tu ngambi enda punas ditelan jeman,” ku iya.

PENYELAI PANTANG IBAN
Kumang bajik nya madahka diri temegah ngembuan pantang ba tubuh laban nya siti ari main asal enggau pengelala bansa Iban.

Enti ba jeman kelia, pengawa nero pantang ba tubuh nya mai reti ti besai ngagai bansa Iban.

Kebuah pia laban sekeda motif pantang nya ulih nentu status sida baka bujang berani enggau pangkat sida dalam komuniti.

Kelimpah mandangka main asal, pantang mega nyadi siti seni kreatif lalu pengelala nya meh ti nempa Kimi nyelai nyadi indu Iban.

“Pantang Iban mega siti seni langkar tengkebang nyelai ti nyadi adat asal enggau sebagi ari main asal bansa Iban ti diturunka ari aki ini kitai kelia.

“Ba aku, Sarawak ngembuan mayuh gempung adat enggau main asal sereta pengerami ti datai ari bemacham etnik ba nengeri tu lalu nya nempa pengelala Sarawak ti nyelai.

“Adat enggau main asal tu meh ti nempa pengarap enggau aspirasyen sereta nentu rayat Sarawak sereta pengelala sida,” terang iya.

Nya alai, Kimi chakah ngetan pemesai guna pesaka main asal nya dikena nentu integriti enggau pengelala rayat tetap meruan.

BANTAI PENGELEBIH DIRI
Ngenang Pekit Mrs Global Asian 2023, Kimi ngelalau raban indu ti deka masuk pekit nya tauka pekit bekaul meseti berani mantaika personaliti enggau penyelai dikembuan sida.

Ku iya, lebuh bediri ba atas panggau kelebih agi lebuh nyaut tanya, anang sesekali nyadi orang bukai tang nyadi meh diri empu sereta nyaut tanya ari dalam ati.

Pia mega, Kimi ngelalau sida ti nyulut ba pekit kumang ngambi semampai ensuruk ngemaruhka diri empu.

“Tabi puji ngagai kita enti mujur champion ba pekit tu lalu pegai teguh meh ulah ti beradat, beterima kasih enggau ngemaruhka diri.

“Nya meh kenang manis kita lalu anang enda ingat ngagai penyereta bukai ti enda mujur, beri meh sida sukung enggau peransang.

“Enti bedau menang, anang nyerah alah laban mayuh pelasar pekit bukai ulih dipasuk kita,” ku lalau iya.

Kimi pechaya sereta andal genap kumang bajik ti pansut ari panggau pageant nya deka manchar terang meri penampak ngagai orang bukai enggau nyadi manah agi.

NGEMBUAN PENYELAI… Tiun sape dalam lagu Telai Pengerindu mai penyelai ngagai lagu nya.
KELAI PENYAYAU… Lagu Telai Pengerindu kelai penyayau Kimi ngagai bansa Iban ti semampai semak ba ati iya.
PENGELALA BANSA… Kimi chakah sereta temegah mantaika pengelala Iban ngagai mata dunya.

LAIN-LAIN BERITA

Sarawak ngulit dua hari

KUCHING: Perintah Sarawak ngemendarka timpuh ngulit selampur nengeri pengelama dua hari, belabuh sehari tu enggau pagila. Nambah ke nya, tambai mega digitang tengan tiang aja

TYT berami enggau YAST Group

KUCHING: Tuai Pemegai Menua (TYT) Sarawak, Tun Wan Junaidi Tuanku Jaafar enggau bini iya, Toh Puan Fauziah Mohd Sanusi udah ngulu Pengerami Makai Lemai Taun

BERITA TERBARU

Sawit naik RM3,750 satu tan

KUALA LUMPUR: BMI Country Risk & Industry Research (BMI), sebuah badan di bawah Fitch Solutions Group Ltd, telah membuat semakan dan menaikkan unjuran bagi harga

JKT penolong jurulatih Kuching City FC ‘B’

KUCHING: Keterujaan buat bekas penyerang berpengalaman yang juga kapten Kuching City FC, Joseph Kalang Tie, 37, dalam menelusuri dunia bola sepak dengan persepsi berbeza. Jika

Dua sahabat didakwa cubaan bunuh lelaki

KUCHING: Dua sahabat didakwa di Mahkamah Sesyen hari ini, atas pertuduhan cubaan membunuh seorang lelaki berusia 36 tahun dalam satu kejadian tular di media sosial