Tembawai Tampun Juah: Menua asal Dayak

KUCHING: Tampun Juah iya nya nama menua penatai asal kitai bansa Dayak di Kalimantan Barat, Indonesia.

John Adam Gilbert bekunsi enggau Suara Sarawak lansa pejalai sida betubuh 136 iku ari Sarawak ngulu Gawai Serumpon Tampun Juah 2019 dalam pun bulan September tu tadi.

Ku iya, mayuh endar jerita bedau kala didinga enggau apin dikarang ba bup jerita tuai kitai Iban dikenang lebuhka nemuai.

“Nyinuk ninga jerita tuai ditusi nyengkaum pasal Tembawai Tampun Juah ti dikumbai sida din Tembawang Tampun Juah ba Kampung Segumon, Kecamatan Sekayam, Kabupaten Sanggau, Kalimantan Barat.

“Tu tembawai kepenudi kitai Dayak ti semina 4 kilometer (km) ari Kampung Mongkos, Serian iya nya ba garis entara menua kitai Sarawak enggau Kalimantan.

NYIDI PENATAI… John Adam Gilbert

“Tembawai tu mega ngembuan mayuh bengkah jerita tuai baik nya ari kitai bansa Iban tauka Bidayuh di Sarawak, tauka mayuh raban bansa Dayak di Kalimantan ti sama ngaku lalu ngumbai penatai asal ari tembawai nya,” ku iya ngepunka randau.

Nyadi nampung jerita peranak ke diau mendam dia, sida nemu nama menua nya bepun ari mimpi betemu enggau orang ari Panggau Libau ti madahka endur nya mih alai tembawai ke penudi kitai bansa Dayak sebedau ti beserara enggau orang ari Panggau Libau enggau bala antu petara.

Nyadi endur tu mega suah disebut ba leka timang bala lemambang dikumbai sida Buah Kana enggau adat ti bisi ngenang pendiau kitai bansa Dayak Iban baka Tusut.

Nitihka pansik sida ari Sketeriat Dayakology di Kalimantan Barat, Tampun Juah tu asal penatai 100 raban bansa Dayak di Kalimantan, kelebih agi gaya pendiau ke bisi kaul enggau kitai bansa Dayak Iban enggau Dayak Bidayuh.

Tembawai tu dikumbai bisi kaul enggau pendiau dua raban bansa tu laban bisi sekeda utai ke agi nyengenda ulih dipeda baka Tiang Sadung enggau Pentik ti suah diabas sereta dikupas endur sida miring sereta beniat ngagai petara.

KELAI… Burung Kenyalang ba legit Tiang Sandung kelai asal penatai kitai bansa Dayak Iban dulu kelia.

Burung Kenyalang ba legit Tiang Sandung ti didiri dia kelai endur nya asal penatai kitai bansa Dayak Iban dulu kelia, ku iya nerang.

Ku jerita tuai sida ke bempu menua, Tiang Sandung tu kelia nyadi endur sida ngengkahka antu pala diulih bala bujang berani pulai ngayau.

Pentik ke digaga baka gamal mensia, sepasang melaki bini sereta bisi mangku anak mit, nyadika tanda orang keterubah nguan menua Tampun Juah ti diambu bansa Dayak Bidayuh.

Menua tu mega agi latung nyentuk sehari tu laban sida ke diau dia semampai meda tauka ngasaika utai ti nyelai nyadi baka kala meda pun buah dia tau bebuah sebarang maya enda baka musin buah menua bukai sereta tau nadai (lesap) lebuh sida deka ngambi.

Nya kebuah sida dia ngumbai menua nya agi latung lalu diuan orang bykai ke enda ulih dipeda kitai ngena mata kasar, nadai dipeda nyengenda.

NALI ADAT… Sida ke dipadu megai pengawa benung ngayam bila buluh ke teresang.

Orang ke diau ba Tembawai Tampun Juah dikumbai sida Orang Tambun lalu tembawai tu bisi tiga bagi.

Tunga kili tembawai betuaika Tuai Rumah Telajan ti nyadi tuai bala antu lalu orang ke nampuk ka nyadi manang suah kia. Kami sebuat enda disagi kia laban endur nya enda likun.

Nyadi ba tengah menua ti endur Tiang Sandung enggau Pentik didiri iya nya tembawai enggi kitai bansa Dayak betuaika Tuai Rumah Buntak.

Lalu muak ke ulu iya nya tembawai enggi orang Panggau Libau ti betuaika Tuai Rumah Laja.

Nya alai ku John, pesan orang ke empu menua enti kitai miring ba menua nya, semua nama sida tuai rumah nya enda tau enda disebut ngambika pengawa mujur dikereja.

NIKIKA PENGABANG… Sida ke bujang bela mai ai basu kaki kena masa penatai temuai ba hari gawai nyadi.

Nyadi nitihka ba bup Tembawai Bejuah dikarang Tawi Ballai 1967 madahka kitai enggau orang Panggau Libau endang serumah betuai ke apai Keling ke benama Gemuring Gading.

Tang pechah sepengudah apai Keling parai lalu rumah sida kena serangkung ulit tiga taun. Sekumbang ke ngulit nya dia Bungai Nuing, lalu bisi kitai menua tu ngumbai iya Sempurai balat tusah ati.

Iya nyau kelalu mangah dataika bala anak mit sida serumah ke ragak diperekas iya ngena wi lalu direndam ba ai. Meda ulah Bungai Nuing nyau majak kelalu enda beradat dia Buntak lalu mai sida pechah rumah. Setengah rumah nya lalu nitihka Buntak lalu iya ke tinggal betuaika Laja.

Bisi mega sekeda jerita tuai ditusi orang ke ngempu menua madahka kitai menya beserara enggau orang Panggau Libau laban bisi sekeda ti ngenggaika adat orang ti jadi mali diukum bunuh, dipantang ngena Buluh Aur ditumbak ke idup-idup.

Pia mega enti anak bala ketuai ti megai menua nya sakit, sida miring minta petara ngeraika anak nya meseti begenselanka anak orang bukai.

NGELALU PETARA… Sekeda ari bansa piring bisi diayan maya Gawai Ngumpan Sandung ba Dusun Segumon, Kecamatan Sekayam, Kabupaten Sanggau ba taba Rumah Betang Dayak, Tembawai Tampun Juah.

“Nitihka tusi bakih aku bansa Dayak Bugau ari Ketunggau ti madah, lebuh beserara nya lalu bebagika semua pengaruh tiga perampan. Kitai Dayak semina milih pengaruh kena bumai enggau ngayau seraya orang Panggau Libau, bala Petara enggau bala Antu lalu milih engkerabun kelimpah pengaruh bukai.

“Berengkah ari nya kitai Dayak lalu enda ulih meda enggau nyata agi bala orang Panggau Libau, bala Petara enggau bala Antu nyentuk diatu.

“Udah nya orang Panggau Libau lalu pindah ke langit nengah tatai Bukit Kedumpai semak menua Merakai di Ketunggau. Sekumbang ke udah beserara, sida sigi agi ngundang pangan diri lalu beambi ngabang maya begawai.

“Tang sekali lebuh sida Buntak begawai dia Bungai Nuing balat bendar mabuk lalu ngerusak rumah sida Buntak.

“Meda baka nya Keling balat malu lalu bejaku enggau Buntak madahka sida badu agi semakai gawai lalu nanam Rian Sandong, seraya bepesan, orang Panggau Libau enda ulih datai batang tubuh enti sida Buntak ngambi sida ngabang.

BASA… John dibasa miau piring lebuh pengawa nanam Pentik.

“Sida semina tau ngambi ngabang ngena leka timang tauka leka sampi lebuh miau piring lalu tungkat sida ke nimang meseti disangkingka gerunung awakka tampak didinga sida ari Panggau Libau sereta mega mesti ngaga piring ba atas pandung.

“Taja pan enda semakai gawai agi tang sida agi ngundang pangan diri baka ngelama tu. Meda baka nya dia Bungai Nuing lalu pedis ati sereta numbit Bukit Kedumpai ngambika nadai agi jalai sida ngundang pangan diri agi baka ke udah,” ku iya ngelansa silik.

Ku John nampung, nyadi Bukit Kedumpai patah tiga ke alai siti dikumbai Bukit Geruga lalu siti agi dikumbai Bukit Kelam ba menua Sintang.

“Utai ke agi bisi dipeda ba tembawai nya diatu iya nya pun changkuk manis ke mesai sepemerap, endur pendai Keling, pun kesindu, pun tapang ke dan iya endur orang berapi rari ke antu enggau endur pun nyiur tumbuh kelia.

“Lalu utai ke nyelai dipeda kami ba hari keterubah bejadika gawai iya nya bisi siku lelaki ke enda dikelala enggau enda ditemu ari ni penatai ti dikumbai orang menua nya orang Tambun bisi datai nyandik patung kayu mesai nembiak mit ngena penyandik ti digaga ari kulit kayu ti ka dijual iya Rp150,000 tang mesti dibeli sama enggau penyandik nya.

“Orang nya mega bisi mai bulu burung ke nyau ragut jai gamal lalu hari bisi merembat ujan nyala enda lama. Lebuh kami ngiga iya baru, ka mai begambar dia iya lalu nadai temu tungga agi.

“Nyadi ku sida ke empu menua nya, lebuh ujan nyala bisi enam iku orang Tambun datai kia nanya nama kebuah bala lemambang ke miau piring enda nyebut sereta nganggauka nama sida,” ku iya ngenang penyelai utai ke bisi nyadi.

Sida sebuat sama alit ati laban Orang Tambun nya lalu nadai ditemu kini penunga. Bisi mega ati nesal laban enda lanchat nanya enggau nyapa, enti enda bisi utai dikenang bai pulai ke menua, ku John nyimpul randau.

TAMBAI PANGGAU… Bala raban kitai Iban ngulu pengawa nanam Pentik ba Tembawai Tampun Juah.