Temegah nyadi anak Sarawak

BETONG: Pesaka dikemegah Sarawak baka tenun pua kumbu, keringkam tauka sungkit chukup berega laban bisi penyelai enggau pengelebih iya empu.

Adun Layar Gerald Rentap Jabu madah, rebak baru kemaya hari patut sedarka pengaya d i k e m b u a n menua tu.

Ku iya, jaku tuai suah nyebut, nadai lebih nyamai agi pengidup ari menua diri empu.

“Tanah Kenyalang tu ngembuan mayuh pesaka tuai ti ngasuh kitai temegah ati ngimpun iya.

“Pemanah enggau penyelai tenun pua kumbu, keringkam tauka sungkit ti chukup berega.

“Ubung ditenun dataika nyadi kain tau ke kelai penyerakup pupu bansa menua tu nyentuk kitai mujur nyaga menua ari sebarang penusah,” ku iya.

Rentap mansutka jaku nya lebuh ditanya pemberita Suara Sarawak beserimbai pengerami ngintu genap taun Hari Sarawak, ditu kemari.

Nya alai ku iya, nadai utai chukup berega kelimpah peranak Sarawak mulaika diri ke menua diri laban ditu mih penatai asal kitai, menua lantang enggau likun endur diau.

“Tu nunjukka pemesai reti tanah Sarawak ba pengidup kitai, menua asal kitai,” tandu iya.

Kelimpah ari nya ku Rentap, Sarawak diatu badu agi tinggal tauka dikelaung ari arus pemansang menua.

Mayuh macham projek pemansang dipejalaika Perintah Gempung Parti Sarawak (GPS) di baruh pegai Kepala Menteri Datuk Patinggi Abang Johari Tun Openg enggau Perintah besai.

Iya madah, projek tu mih deka nyadi ejen ti ngubah rampa menua Sarawak kelebih agi ba kandang menua pesisir enggau menua ulu.

“Tu nunjukka pengelantang rayat semampai dikemerat lalu Perintah Sarawak naka ulih niri negika nasip rayat enggau minta pulai hak menua tu nitihka pematut.

“Kitai deka nentuka Sarawak maju agi datai ba taun 2030 ila,” ku iya madah nyemetak.

Peranak Sarawak ku Rentap, bisi pengelebih laban bisi urup ‘K’ ba tingki sida, meri hak khas enggau ngasuh kitai temegah.

“Tu kelai kitai peranak asal Sarawak. Nya kebuah aku deka ngingatka rebak biak ngenang baru cherita pemansang Sarawak kenyau ari suba nyentuk diatu.

“Pia mega lebuh kitai nambahka penemu, kena peluang diberi perintah enggau manah ngambika jemah ila kitai ulih gawaka pemansang menua tu,” tandu iya nyemetak.

Rentap meransang peranak menua tu begulai nyaga pengelikun enggau pengelantang sereta semampai talukka menua Sarawak.

Selamat ngintu Hari Sarawak. Intu Sarawak! Jaga Sarawak!

Suara Sarawak