ARTIKEL

Tempa tukuh inovasyen baka Steve Jobs enggau Bill Gates

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Think & Thinker Mini Lab (T&T Mini Lab) dikeandal ulih nempa tukuh inovasyen baka Steve Jobs enggau Bill Gates ari anak Sarawak empu enti nerima sukung ari semua orang.

Nya alai, Menteri Muda Perengka Pengangkut, Datuk Dr Jerip Susil madah, apai indai, tuai komuniti enggau tuai raban bansa mesti begulai ngemujurka projek nya lebuh meransang nembiak ngaul dalam T&T Mini Lab ti deka dibuka ba sekula berengkah pun taun baru.

“T&T Mini Lab nya bilik mayuh guna ungkup tuju inovasyen ba sekula nentuka bala nembiak mantaika penau enggau pengelandik sida dalam bidang inovasyen digital kelebih agi dalam pengelandik sida nempa produk inovasyen enggau robotik.

“Nya mega palan bedua penemu enggau pengelandik entara bala nembiak, pengajar enggau pakar industri.

“Pia mega, palan tu ulih nembiak ti landik dalam inovasyen digital enggau robotik,” terang Jerip.

Jerip mansutka jaku nya beserimbai enggau Pengawa Bejadika T&T Mini Lab 2021 bagi SMK Siburan di sebuah hotel tebilang, kemari.

Sama datai Sapit Residen Serian Selamat Jati Yanjah, Pegawai Khas Opis Menteri Pelajar, Sains enggau Pansik Teknologi Shariman Jamil, Pegawai Opis Pelajar Pelilih Padawan Abang Adam Abang Deli, Prinsipal Sekula Sekondari (SMK) Siburan Patrick Pawan enggau Menijar Kanan Tegas Fredick Kevin.

Jerip ke mega Sapit Chairman Tabung Ekonomi Gagasan Anak Sarawak (Tegas) madah, menua tu ulih nempa nembiak ti ngembuan runding kretaif enggau inovatif nengah pengelandik ba bala nembiak enggau pemisi infrastruktur baka T&T Mini Lab.

Ku Jerip ke mega Adun Mambong, ambika banding ba sitak iya empu, mayuh palan pematak ulih nyadi pematak dagang temuai dilawa temuai luar.

Jerip madah, tu nyengkaum Palan Nyaga Jelu Siga Semenggoh, Pegung Ai Angat Annah Rais enggau sekeda wong.

Ngelansa silik iya madah,komuniti ditu mesti pintar ngiga inisiatif bekenaka teknologi pemadu baru pasal baka ni ulih ngaga promosyen enggau matak minat orang luar kia taja diberi pengelebih baka nya.

“Nya kebuah, pelasar baka T&T Mini Lab ulih meri penerang ngagai bala nembiak pasal pemansang baka ‘web developer’, ‘apps developer’ dikena mantu komuniti kitai ba genturung pendiau ngaga aplikasyen enggau web kediri.

“Nya alai, orang luar ke deka datai kitu muntang agi bulih semua penerang baka palan ngenduh, perengka pengangkut enggau kedai makai nengah aplikasyen ti ditengkebang nya tadi,” terang iya.

Nambahka nya, Jerip madah, entara pemanah bukai ke ulih dibantai ari Projek T&T Mini Lab nya dalam pemansang pengelandik nengkebang teknologi dron.

Berebak enggau nya ku iya, endang amat pemansang teknologi dron beguna amat ba pengidup kitai diatu kelebih agi dalam sektor betanam betupi moden.

“Ambika banding, dron majak dikena nyadika kereban dikena nukar pengereja pengawa ba pengawa manchit rachun enggau baja tang dron ke bisi diatu agi mar dibeli.

“Nya alai, enti sema bisi anak kitai ulih nengkebang dron empu nya ditempa ari T&T Mini Lab tu ila.

“Nya kebuah, engka kitai ulih ngembuan sebuah dron ke ngembuan guna ti sebaka dalam pengawa betanam betupi moden ke murah agi,” ku iya nerang.

T&T Mini Lab nya inisiatif dipejalai Komuniti Pengawa Belajar Inovatif Tegas dalam pemansang pengelandik kelebih agi nembiak sekula ngambi SMK Siburan nyadi entara 11 buah sekula pemungkal di Sarawak.

BERITA LAIN

BERITA TERBARU