Tengkebang kediri, kurangka nunda lagu orang

KUCHING: Siku penanyi veteran Iban, Augustine Merikan ngelalau raban pengemeran muzik enggau lagu-lagu Iban ngambika terus nyaga identiti enggau penulin lagu Iban.

Kenu ku iya, diatu artis Iban majak mayuh. Lagu enggau muzik Iban pan majak mayuh.

“Nya alai, enti ulih kitai patut ngurangka pengawa nunda tauka nitihka tiun lagu orang ke udah tebilang.”

“Manah agi kitai nengkebang kediri lagu ku iya. Nya siti jalai kitai ulih ngetanka identiti lagu Iban.”

“Ngena peluang tu aku arap penanyi kitai Iban bela begempung sereta begulai sejalai enggau pangan diri. Anang ngira nuan penanyi lama tauka baru,” ku lalau Augustine lebuh dirandau pemberita, apin lama ke udah.

Augustine Merikan

Tandu Augustine, pekara ke pemadu beguna sama-sama mih kita nengkebang lagu kediri.

“Tu siti chara kitai ngurangka agi kitai nunda lagu orang bukai. Mayuh tiun lagu kitai Iban diambi ari tiun
lagu orang bukai ti udah tebilang.”

“Ukai aku madah salah tang sapa ke nemu mengkebang lagu kediri, manah
agi mih lagu gaga diri.”

Kitai mega ulih ngetanka penulin tauka kualiti lagu kitai Iban,” ku iya madah nyemetak.

Ungkup penemu, Augustine kala tebilang enggau lagu Bujang Paku Lawang, Aku Meruan Nganti enggau Anak Sarawak.

Diatu iya udah ngetu gawa ba bank, lalu dichiri nyadi siku ari kaunselor ba Kaunsil Mengeri Sibu (SMC). Kenyau ari terubah iya nyadi artis rikod.

Augustine udah mujur ngeluarka 19 iti album lalu iya bisi mega enggau ba album kompilasyen. Entara nama album ke agi dikeingkat iya nya Bujang Paku Lawang, Jang Dani Jang, Indu Menyawai, Bulan Begantung Senduk, Aku Nyau Enda Diguna, Idup Sama Seati, Anak Sarawak enggau sekeda ke bukai.

Berita penuh ba Suara Sarawak pagila.

Suara Sarawak