KUCHING: Program Dapur W.I nyadi inisiatif gerempung ukai dikuasa perintah (NGO) mantu Perintah Sarawak nempa rayat bepengerai.

Menteri Pengintu Pengelantang Pendiau, Komuniti, Orang Indu enggau Pemansang Anak Mit Datuk Seri Fatimah Abdullah madahka pemakai enggau pengerai nyadi pekara beguna amat lalu patut dikemat genap iku rayat menua tu.

“Pekara ti mai nuju pemansang menua iya nya rayat ti bepengerai lalu kitai dekaka pekara tu diperati semua raban.

“Semua tu bisi kaul, lalu raban indu nyadi orang pemadu beguna beratika pemakai dinah ngagai sida sebilik ngembuan nutrisi ti bela sereta meri pemaik ngagai pengerai tubuh sida,” ku iya.

Fatimah madah munyi nya lebuh dirandau pemberita pengudah pengawa bejadika Program Dapur W.I ti diatur Persatuan Perkumpulan Wanita Sarawak (PPWS) di Mydin Petra Jaya ditu, tadi.