Terang silik formula mayar geran

SIBU: Kepala Menteri Datuk Patinggi Abang Johari Tun Openg deka perintah besai nerangka formula nama ke diguna dikena meri geran ngagai Sarawak bepelasarka Perkara 112 (d) Kunstitusyen Perintah Besai.

Iya madah naka tu, nadai formula dikena mutarka penyampau ti diberi ngagai perintah nengeri.

“Sida deka meri Sarawak agih nitihka atur 112 (d) Kunstitusyen Perintah Besai iya nya meri RM52 juta bepelasarka puku ke dikira iya nya urung.

“Sigi nadai formula, nya kebuah aku enggai nerima. Sida udah dulu meri, kitai ngambi, tang agi segi prinsip nya salah. Patut bisi formula baka ni sida (perintah besai) bulih RM52 juta ungkup diberi ngagai Sarawak.

“Tu meseti bisi formula laban sida nerima chukai ari Sarawak, nyengkaum chukai penatai pemisi, chukai kereban pengangkut, chukai korporat enggau duti setem dibayar ngagai Kuala Lumpur (Putrajaya).

“Nya alai, KL meseti meri pulai ngagai Sarawak nama utai ke udah diterima bepelasarka formula.

“Aku udah berandau dalam Komiti MA63 (Perjanjian Malaysia 1963), (kitai) deka formula ke diguna ba pengawa meri geran (ngagai Sarawak) bepelasarka Artikel 112 (d) Kunstitusyen Perintah Besai,” ku iya maya bejadika Gempung Parti Sarawak (GPS) Zon 9 Sibu ba Dewan Suarah Sibu, kemari.

Abang Johari madah munyi nya lebuh nimbal penyampau geran ke diberi nitih penerang ke udah dipansutka Menteri Wang Lim Guan Eng ungkup Sarawak.

Iya deka nemu baka ni penyampau nya ulih diberi ngagai Sarawak.

Abang Johari ke mega Presiden GPS mega meri jamin perintah ke diiring GPS sigi enda bankrap lalu deka terus berunding enggau Putrajaya nagih hak ke udah lenyau.

“Seagi GPS bekuasa, kami enda ngelak ham kami ba sentang imigresen lenyau, nya endang hak kami. Hak imigresen kami harus dijaga ungkup semua kos. GPS ulih nyaga tu,” ku iya.

Kelimpah nya, Abang Johari mega madah Kanun Tanah Menua enda ulih disegulai enggau Kanun Tanah Negeri enti enda, pekara nya deka lebih ngenusah.

Kelimpah nya, iya ngasaika gempung perintah deka jaku ‘nitihka Sempekat Malaysia 1963’ dipasuk dalam Perkara 1 (2) ke diubah lalu reti nya dibaruh Perkara 160 (2) meseti bemalinka Sempekat Malaysia 1963 (MA63), ukai nitihka Sempekat Tanah Melayu 1957.

Tandu iya, iya madah perintah diatur enggau manah ari sukut belanja enggau penatai pemisi.

Entara bukai, iya bisi nyebut pasal raban indai di Sarawak ke benung bepenti udah beranak deka nerima bantu RM450 bepun taun tu.

Iya madah anak mit ke baru ada ba nengeri tu deka nerima insentif RM1,000.

Berebak enggau nya, iya madah nyema ungkus nyambung karan baruh RM5,000, perintah deka nanggung semua penyampau bayar nya.

“Taja pia, enti penyampau bayar nya ngelui RM5,000 nyentuk RM10,000, kperintah nengeri deka mayar 70 peratus ari ungkus lalu 30 peratus agi dibayar kediri,” ku iya.

Ungkup pengawa meli ai, nyema penyampau nya bisi 11,300 liter sebulan, tu mega deka ditanggung perintah nengeri, ku iya.

Suara Sarawak