Terima kasih ke tulung semua piak

SARATOK: Chairman Parti Demokratik Progresif (PDP) Pampang Krian Jeffry Jimbun Walter Kidang meri besai terima kasih nuju semua piak ti udah mantu sida ngemujurka pengawa nyadung bantu bekal pemakai ngagai sitak Krian apin lama.

Pengawa nyadung bantu barang pemakai ari perintah GPS diatur dua hari bejurut kena 13 enggau 14 April tu tadi.
Sepenyampau 4736 Ketuai Bilik (KIR) di pelilih Krian udah nerima bantu nya diberi nengah Palan Servis Komuniti Adun Kalaka Datuk Abdul Wahab Aziz.

“Terima kasih Kepala Menteri Datuk Patinggi Abang Johari Tun Openg laban udah ngemendarka agih belanja tu. Pia mega nuju Adun Kalaka Datuk Abdul Wahab Aziz laban nyaup ngemujurka pengawa nganjung bantu pemakai tu.

“Enda tinggal mega nuju semua ejensi perintah baka Opis Kaunsil Pelilih Saratok, Opis Pelilih Saratok,RELA, PDRM Pampang Saratok,Chairman PDP Kalaka Kaunselor Khairul Azizi, Sapit Chairman Kaunsil Pelilih Saratok Kaunselor Haji Mohd Duri,Mandal Ketuai Pampang PBB Kalaka Kasdi Pandi.

“Kelimpah nya nuju bala AJK Pengatur Bantu Pemakai, 50 iku volunteer ari parti PBB N.38 Kalaka enggau Parti Demokratik Progresif N.39 Krian enggau bala bukai ti udah gerah jari mantu pengawa kami sebuat,” ku iya maya dirandau pemberita apin lama ke udah.

Bantu ungkup sitak Krian dulu digempuru ba Dewan Masyarakat Sri Krian sebedau dianjung ngagai enam iti tim nitih nama penghulu ti megai sitak Seblak,Sebetan,Awik,Kabo,Krian enggau Tengalat.

“Arapka bantu bekal pemakai tu ulih ngurangka penyuntuk pengidup mensia mayuh ba pelilih Krian.

“Aku mega ngelalau mensia mayuh ngambi sama nyaga pengerai diri,” ku iya.