Terima kasih, penanggul udah teputar

KABONG: Peranak Kampung Sungai Endot Lot enggau Sungai Endot ditu berasai lantang seput pengudah penanggul benteng tusur ke ditapi udah teputar.

Ketuai Kampung Sungai Endot Lot,Muhamad Man madah meri terima kasih ngagai piak bekaul laban udah mujur mutar penanggul ditapi sida enggau lengkas.

“Puji Tuhan, asai lepas ari nyawa baya.”

“Taja benteng tu digaga semina baka ‘ngaminka aja’ tang nya pan diperati udah chukup manah seraya nganti digaga manah agi jemah,”ku iya.

“Terima kasih besai nuju semua ejensi-ejensi perintah bekaul, siku-siku orang sereta piak Opis Palan Servis Komuniti Kaban Kunsil Nengeri (Adun) N.40 Kabong ketegal ari pengibuh enggau pengiruh sida utai tu (benteng tusur) mujur diputar enggau jampat,”

“Laban diatu musin ai pasang besai, nya alai penembu benteng tanah tusur tu chukup meri pengelantang ba kami sebuat.”

“Enti enda ketegal saup jampat ari piak bekaul tentu peranak dua buah kampung ditu balat agi tasah sereta rugi,”ku iya maya dirandau pemberita, apin lama ke udah.

Dulu ari tu, taba benteng nya tusur lalu ngujungka dua buah kampung nya kena penusah ampuh bah duju ai tasik lemai kilah ensana.

“Udah tu ila,aku deka nguji ngaga peminta nuju ejensi-ejensi perintah tauka piak opis bekaul penanggul baka tu ngicha ulih ngaga benteng tanah tusur ditu enggau tegap agi awakka penusah tu badu nyadi, “ku iya.

Berebak enggau nya Adun Kabong Mohd Chee Kadir muji pengawa ke udah digaga piak Opis Parit Enggau Entali Ai (DID) enggau Ejensi Pemansang Sitak Betanam Betupi (IADA) Betong,Opis Pelilih Mit Kabong,Balai Bomba Enggau Penyah Penusah enggau JPAM Pampang Saratok sereta orang kampung empu laban ari penyikar sida ngujungka penusah ampuh bah tu ulih diputar enggau jampat.

Suara Sarawak