KUCHING: Adun Layar Gerrald Rentap Jabu nyadi siku ari 17 iku penerima pangkat Panglima Setia Bintang Sarawak ti mai gelar Dato nyerumba Hari Pengada Ke-85 Tuai Pemegai Menua Tun Abdul Taib Mahmud, ensana.

Dalam kunsi di Facebook iya, Gerrald madahka beterima kasih ngagai Tun Taib laban udah meri anugerah nya.

“Ngarapka Tun Taib panjai umur sereta diberekat sida sebilik sereta seruran dikemata Tuhan.

“Terima kasih ngagai Kepala Menteri Datuk Patinggi Abang Johari Tun Openg laban udah nyadi Tuai Parti Pesaka Bumiputera Bersatu (PBB) enggau perintah Gempung Parti Sarawak (GPS) meri sukung ngagai tanggungpengawa aku nyadi pengari rayat,” ku iya.

Iya mega meri pengaga ati ngagai kaban belayan, sida sebilik enggau rayat kelebih agi Dun Layar enggau Betong ti udah meri jaku pengaga ati sereta sampi.

“Anugerah enggau pangkat tu ditujuka ngagai kita semua ti udah meri sukung, jaku lalau enggau sampi sepemanjai pejalai aku ngelama tu.

“Semangat enggau aku tu, meri pengering, pechaya enggau inpirasyen ngagai aku ngambika terus ngemansangka Sarawak.

“Terima kasih semua, kami sebilik besampika kita semua gerai enggau beerakup meri servis pemadu manah ngagai Sarawak,” ku iya.