KUCHING: Trajide sebuah entukar 4WD ti labuh nabanka semilan iku nyawa kena 1 Januari tu tadi agi balat disebut penguna sebelah media rama.
Cherita sida tubuh semilan ti midang ketegal lemas dalam kerita nya nyadi berita pemadu sinu diterima mensia mayuh kelebih agi lebuh ngintu Taun Baru 2021.
Sida ti midang ba penusah besai tu Siti Aisha Abdullah, 36 taun, Mohd Ahmad Mohd Hamdan (empat bulan), Muhd Mustaqim Mohd Hamdan (5) enggau Mohd Aiman Mohd Hamdan (7), Ronany Ting (33), Wallace Phang (7), Alvin Phang (12), Khairunnisa Muhamad (14) enggau Nor Shuhada Mohamad (16).
Bala penguna media rama ngenataika penyinu ati enggau besampika semengat sida ke midang nya diau likun sereta diberekat.
Berebak enggau nya, sekeda penguna facebook minta raban feri nyendiaka kereban pengelikun baka selapat jalai ari tebing nuju ke feri nyeliahka penusah baka tu nyadi baru jemah ila.
Ku sida, raban pengereja ti gawa ba feri mega patut sikar lebuh beratika pengelaju entukar ke tama lalu nagang entukar nepan feri enti sema udah sarat.
Pia mega, sekeda bala penguna media rama mega madahka pemesai guna meri bantu CPR ngagai orang ti lemas.
Nya alai kitai anang enda ingat nyaga pengelikun diri lebuh deka nepan feri baka pansut ari entukar, muka cheremin kerita sereta semampai bejimat laban penusah ti baka tu ulih nyadi sebarang maya.