KAPIT: Pelilih Kapit napi bemacham penanggul trafik enggau perengka pengangkut ke mesti diputar raban bekaul pengudah baru disikap enggau jalai alun.
Nya kebuah, Menteri Perengka Pengangkut Sarawak, Datuk Seri Lee Kim Shin udah ngatur pejalai ngabas seraya gawa ke pelilih tu kena Hari Dua tu tadi.
Entara pekara ke chukup diguna ba pelilih Kapit iya nya terminal bas dikena nangkup peminta servis bas ari Sibu enggau Kapit ke udah berengkah beoperasyen.
Ku Kim Shin, pekara tu chukup diguna pengudah Jalai Sibu-Kapit udah tembu ngujungka begunaka mayuh agi perengka pengangkut dikena nangkup peminta peranak.
Pia mega, iya beratika pengawa numbuhka mengeri satelit dikena ngurangka palan sekut ba sesebengkah endur aja di pasar Kapit.
“Jalai alun sekut tu nyadi ketegal semina siti jalai tama enggau pansut ngagai Pasar Kapit lalu ngerenchah siti aja lampu trafik.
“Pia mega, gaya jalai ti sempit iya nya ‘single lane road’ dipeda enda engkeman dikena bepelasarka pemansang di Kapit enggau endur besemak.
“Dikena mutarka penanggul tu, entara chara nya numbuhka mengeri satelit dikena ngurangka mensia mayuh napatka sebengkah endur aja,” ku iya nerang.
Dulu ari nya, iya udah ngulu taklimat di Opis Residen Kapit beserimbai enggau pejalai ngabas seraya gawa ngagai Kapit, Hari Dua tu tadi.
Ku Adun Senadin nya, penanggul sekut di mengeri tu isu berat ke mesti diputar lengkas dikena nyeliahka mayuh agi penanggul nyadi dudi hari.
Nambahka nya ku iya, sistem perengka pengangkut sungai agi ulih dikena taja mayuh penguna ngena jalai darat pansut ari Kapit.
Berebak enggau nya, iya minta Komiti Pemansang Bagi Menua Kapit beratika pengulih perengka pengangkut sungai nyadi perengka ngangkut barang mata enggau nyadi eko dagang temuai.
Pia mega, Kim Shin enggau raban iya udah ngabas Taba Perambu Terminal Bas Kapit di Jalai Kapit/Song.
Udah nya, iya mendingka penerang ari Opis Tanah enggau Survei pasal pemanah taba ke diperambu nya.
Tu nyengkaum endur nya udah dikelala deka didirika lot kedai semak terminal bas nya.
Pia mega, rumah mega deka didiri semak taba perambu nentuka terminal bas nya enda puang lalu penguna ulih ngasaika pemaik pengudah projek nya tembu ila.
Kim Shin nampung pejalai ngagai Kem Arang Batu Nanga Tulie, Batang Rejang, Kapit ngambi beratika operasyen ngangkut arang batu ari kem nya.
Sida mega diberi taklimat pasal operasyen ngali sereta pemansut arang batu ba endur nya ke udah beoperasyen kenyau ari 1990-an enggau ulih mansutka urung 600,000 tan metrik ninting taun di Nanga Merit.
Arang batu nya diangkut ngena bot tunda ngagai Palan Penyangkai Kapal Tanjung Manis lalu ulih ngundan 2,000 ngagai 3,000 tan metrik arang batu.
Opis Menteri Perengka Pengangkut Sarawak nengah Kaunsil Sungai Sarawak (LSS) seruran matau enggau bejalaika pengawa neritka atur nentuka atur navigasyen dititih pengempu bot tunda dikena nyaga pengelikun enggau pengelantang penguna bukai.
Sama datai Sapit Menteri Perengka Pengangkut Datuk Dr Jerip Susil, Sapit Menteri di Opis Premier Sarawak Jefferson Jamit Unyat enggau Residen Bagi Menua Kapit Nyurak Keti.
