Terubah iya meda kesulai kuning mayuh beraban

KAPIT: Pemayuh kesulai kuning dipeda terebai ba sebengkah enduru ba Kapit nyadi entara pekara nyelai ti ditemu raban pengajar ti ba rantau jalai ngusung rumah nembiak ba rumah panjai.

Kepala Pengajar SK Nanga Oyan, Mohamad Mobun madahka kenyau lama udah ngajar ba sekula nya, tu keterubah iya meda penyelai kesulai kuning nya.

“Nyau deka sepemanjai jalai ti dipansa kami bisi meda kesulai kuning tu ayan terebai.

“Ku sida, pekara tu jarang nyadi, nya alai aku meda pemayuh kesulai ti terebai ditu amat nyelai,” ku iya lebuh dirandau Suara Sarawak ditu, kemari.

Tandu iya, peranak di menua pesisir madahka fenomena kesulai kuning tu nyadi semina dalam seminggu aja.

Mohamad Mobun

“Udah nya, kesulai tu enda ayan agi, kini tuju kesulai kuning tu pan enda ditemu.

“Enda nyangka, lebuh deka ngusung rumah panjai ngabas nembiak kami sebuat ulih meda pemanah rampa menua di Kapit ditu,” ku iya.

Ku Mohamad, iya alit ati meda kesulai ti kelalu mayuh terebai ba tisi jalai taja palan nya suah ditengah sida ngelama tu.

“Engka bagi peranak ti diau ditu, sida ngumbai tu pekara ke suah nyadi laban kala nyadi semina jarang, tang tu keterubah aku meda kesulai kuning mayuh amai.

“Aku bisi nguji megai kesulai nya, siti peneleba ti enda kala diasaika aku ngelama tu,” ku iya.

JARANG NYADI…Nyau deka sepemanjai jalai ti dipansa kami bisi meda kesulai kuning tu ayan terebai, ku Mohammad.

Suara Sarawak