KUCHING: Beduduk ari peminta terung Dayak chukup mayuh ba Semenanjung Malaysia, ngujungka Donny Linan, 42 taun tebuka runding nguji numbuhka sebuah kebun endur nanam terung Dayak enggau kuchai di Semenanjung Malaysia.

Donny madahka iya udah bedagangka mayuh bansa pemakai Dayak ba Semenanjung Malaysia kenyau semilan taun ke udah.

“Aku diau ba Semenanjung Malaysia urung 14 taun ke udah ketegal ti gawa ditu.

“Lebuh meda bansa Dayak ti suah begiga ke pemakai Sarawak, aku lalu nguji bejual pemakai Dayak baka terung Dayak, salai ikan, salai undang, sayur kuchai, rusit, jukut ikan sungai enggau ke bukai,” ku iya lebuh ditanya Suara Sarawak, kemari.

Ku Donny ti asal ari Sibu, iya keterubah bejual ba Pasar Borneo Johor meda peluang makit pemakai Dayak din chukup manah.

“Anak Sarawak ti gawa ba Semenanjung Malaysia chukup mayuh, nya alai sida suah ngiga pemakai ti mulaika pengingat ngagai menua diri empu.

“Diatu aku udah bisi pemeli tetap bansa Dayak empu, sida endang sigi nganti penatai aku bejual mayuh pemakai Dayak ti mar ditemu ba kedai besai di Semenanjung Malaysia,” ku iya.

Apai ngagai tiga iku anak tu madahka iya bejual pemakai Dayak ari rumah lalu dagang tu dipejalaika sida sebilik.

“Diatu aku bejual nengah pelasar Facebook dikumbai Tim Pasar Borneo, bisi mega orang meli ke rumah enggau nengah Gerempung Pasar Borneo Seri Kembangan di Selangor.

“Aku mega bisi bejual ba pasar malam iya nya dua kali seminggu ba Sungai Udang Melaka,” ku iya.

Donny madahka, bekal pemakai ti dijual iya endang dibeli ari Sarawak baka terung Dayak, kuchai, ikan salai, tepung mulung, sadin enggau ke bukai.

“Aku minta bala di Sarawak ngepos barang nya ari menua.
“Taja begunaka belanja ti besai, tang aku gaga laban ulih nangkup peminta anak Sarawak ngulihka pemakai dikedeka sida ditu.

“Kekadang enti barang ti dipos laun datai, terung aku jai, salai bekuap, bekulat, barang pechah tauka keremping, tang nya enda ngasuh aku mantul laban aku deka nangkup peminta sida ditu,” ku iya.

Meda gaya nya, dia iya bulih penemu numbuhka sebuah kebun terung Dayak enggau kuchai din laban peminta ngagai sayur tu chukup tinggi.

“Ungkup makit ti lebih besai ba Semenanjung Malaysia, aku muka sebuah kebun terung Dayak enggau kuchai ditu awakka mayuh agi sayur tu ulih dijual.

“Aku ngarapka, perintah ulih meda pengawa kami tu lalu ulih meri bantu ngagai anak Sarawak ti bedagang ba Sememanjung Malaysia.

“Kelimpah nangkup peminta anak Sarawak ngulihka pemakai Dayak, aku mega ngandalka pemakai tu ulih dipandang ba serata menua,” ku iya.