ARTIKEL

Terus jaga pengerai enggau pemeresi diri, kes COVID-19 agi ngerekai

Facebook
Twitter
LinkedIn
WhatsApp
Telegram

KOTA SAMARAHAN: Mensia mayuh kelebih agi ba Sarawak dilalau terus nyaga pemeresi enggau pengerai diri berindik ari kes COVID-19 ti agi diripotka nyentuk diatu.

Ku Sapit Premier Sarawak, Datuk Amar Dr Sim Kui Hian, mensia mayuh anang telunga enggau pekara tu laban igi penyakit COVID-19 agi ngerekai.

Ku iya, suba lebuh kes COVID-19 diripot, semua orang chukup nyaga pemeresi nyengkaum suah endar masu jari.

“Taja pia, diatu semua orang baka enda ingat ke COVID-19 agi ngerekai lalu bisi nya bebadi ketegal igi penyakit tu.

“Nya kebuah, jaku tangkan nuju mensia mayuh… ingat semampai nyaga pemeresi jari, ngena sengkabung mua enggau berubat ba sepital tauka klinik enti enda bepengerai,” terang iya.

Menteri Pengerai Mensia Mayuh, Pengawa Berumah enggau Perintah Lokal nya mansutka jaku nya ngagai pemberita lebuh ngabas Sekula Bansa China (SJKC) Kai Nang, ditu kemari.

Ku iya, neritka baru Atur Mindah Betagang (PKP) dikena nagang pengerekai COVID-19 ukai siti pilih ti manah.

“Nya kebuah kitai udah ngena kos tinggi bejalaika program vaksinasyen ngambi mensia mayuh bisi pengetan tubuh sereta dijaga ari igi penyakit nya,” terang iya.

Ditanya pasal penyampau kes COVID-19 di Sarawak, Dr Sim madah, iya nadai penyampau pemadu baru lalu meseti ngulihka penerang ari Opis Pengerai.

“COVID-19 agi bisi lalu kitai diatu idup enggau igi penyakit nya tang pekara pemadu beguna diatu nya, enti kita ditemu positif, jaga diri empu enggau orang bukai.

“Nuju sepital tauka klinik pengerai besemak laban sida bisi Paxlovid antivirus oral ti diberi pechuma,” ku iya nyemetak.

Ba Aum Kunsil Nengeri (DUN) empai lama, Dr Sim madah, naka 18 November tu tadi bisi 328,256 kes enggau 1,793 kes pemati ketegal COVID-19 diripotka ba Sarawak kenyau ari kes keterubah diripotka kena 13 March 2020.

Ku iya, bisi 325,330 kes tauka urung 99.11 peratus udah suman ari igi penyakit nya.

Naka 18 November tu tadi, iya madah, bisi lapan kes pemati ketegal COVID-19 taun tu ngujungka tikas pemati nya 0.32 ungkup tiap 100,000 peranak dibanding 167 kes pemati enggau tikas pemati 5.41 ungkup genap 100,000 peranak diripotka ba taun 2022.

Terang iya, tikas ngena Unit Sakit Raya (ICU) ungkup COVID-19 ba tikas minimum lalu sepital bisi fasiliti chukup nangkup peminta ke diatu.

LAIN-LAIN BERITA

Lenyau mentor ti bepenau

KUCHING: Penau Tun Pehin Sri Abdul Taib Mahmud enggau bisi runding strategik mujur mai pemansang moden ngagai Sarawak. Menteri Industri Pemakai, Komoditi enggau Pemansang Wilayah

Projek ART Johor bechuntoka pemujur Sarawak

KUCHING: Sistem Transit Aliran Autonomi (ART) di Sarawak deka nyadi malin ungkup projek ART ti deka dipejalai di nengeri Johor. Perintah Nengeri Johor benung ngelanggur

Sarawak ngulit dua hari

KUCHING: Perintah Sarawak ngemendarka timpuh ngulit selampur nengeri pengelama dua hari, belabuh sehari tu enggau pagila. Nambah ke nya, tambai mega digitang tengan tiang aja

BERITA TERBARU

Allahyarham Tun Taib, Arkitek Pemodenan

MIRI: Yang di-Pertua Negeri Tun Pehin Sri Abdul Taib Mahmud digambarkan sebagai seorang Arkitek Pemodenan kerana sepanjang perkhidmatannya sebagai Ketua Menteri, beliau berjaya mengangkat serta