Tetap nyukung taja bebida penemu

“Kami deka seruran meri kerejasama ngagai Abang Johari kelebih agi ba pemansang menua pulaika pemaik rayat.” – Wong Soon Koh.

KUCHING: Aku deka seruran nyukung Kepala Menteri taja kami enda sepenemu ba politik, ku Presiden Parti Sarawak Besatu (PSB) Datuk Wong Soon Koh.

Ku iya, taja ngembuan penemu politik ti bebida, tang seduai deka semampai bebakih, kaul begulai tetap rat.

“Kepala Menteri Datuk Patinggi Abang Johari Tun Openg siku ari ketuai aku.

“Kami deka seruran meri kerejasama ngagai Abang Johari kelebih agi ba pemansang menua pulaika pemaik rayat,” ku iya.

NEMUAI MERI BASA… Soon Koh ngatur pejalai nemuai meri basa ngagai Kepala Menteri Datuk Patinggi Abang Johari Tun Openg pagi tadi di Wisma Bapa ditu.

Soon Koh mansutka jaku nya lebuh dirandau pemberita TVSarawak enggau Unit Komunikasi Awam Sarawak (Ukas) pengudah iya ngatur pejalai nemuai meri basa ngagai Abang Johari di Wisma Bapa ditu, pagi tadi.

“Randau entara aku enggau Abang Johari mega chukup manah sereta bela bebasaka pemutus pangan diri.

“Taja pia, aku enda ulih madah nama buah randau kami duai.

“Semina ulih madah, aku ti nyadi Presiden PSB deka naka ulih besaup enggau Kepala Menteri kitai ba pengawa ti meri pengelantang ngagai rayat nyengkaum pemansang Sarawak,” ku iya madah nyemetak.

Lebuh ditanya pasal sapa bagi nyilih penuduk iya ba Kabinet Sarawak, ku Soon Koh, tu bepanggai ba Abang Johani nentuka pekara nya.

Ba sebengkah aum pemberita 15 Julai tu tadi, Soon Koh madah ba mua mayuh ke alai iya nyurutka diri ari penuduk ba kabinet nengeri.

Ba aum nya mega, iya madah deka nyuaka surat badu gawa ngagai Kepala Menteri pengudah seduai betemu mua lalu mutuska randau.