KUCHING: Rindu belajarka pekara baru enggau meretika budaya bansa Dayak di tanah Borneo meransang siku penengkebang cherita katun tauka animasyen mansutka video diberi nama The Pillar of Strength.

Mohamed Khairi bin Ibrahim tauka tampak agi dikangau Ayie Ibrahim, 45 taun, udah masuk dalam industri animasyen di Malaysia kenyau ari taun 1995.

Peranak Melayu, asal ari Johor madah, iya tekait ati meda penyiru budaya raban bansa Iban, Orang Ulu, Kenyah, Bidayuh, Iban, Murut, Kelabit, Melanau enggau Orang Asal tanah Borneo ke bukai.

Lebuh dirandau, Ayie Ibrahim madahka diri semampai nyidi pekara ke baru enggau nyelai ngambi ulih ‘ngiga’ penemu dikena nengkebang cherita animasyen tauka katun tu.

“Aku teulihka runding ngaga cherita katun tu pengudah labuh pengerindu meda penyelai dikembuan tiap etnik ti nguan tanah Borneo.

“Taja tebal agi budaya idup Orang Asal di Sarawak udah jauh berubah nitihka arus pemansang moden tang gaya idup sida agi bemalinka adat asal.

“Nambahka nya, sida meruan ngemerankan main asal ti ditampung ari aki ini kelia.

“Pekara tu balat ngasuh aku gagit agi belajar sereta meretika gaya pengidup kelebih agi bekaul enggau jerita tuai ngambi nyadi siti cherita katun pandak.

“Ba video The Pillar of Strength tu, aku milih raban bansa Iban laban baka ke ditemu kitai, nya raban bansa pemadu besai di Sarawak sereta ngundan mayuh pesaka asal enggau budaya ditampung ari aki ini sida kelia.

“Nya kebuah, budaya enggau gaya pengidup raban bansa Iban di rumah panjai udah matak perati aku ngambi dikunsi dalam filem animasyen pandak tu,” terang Ayie.

PENYELAI BUDAYA

Ayie ngasaika budaya bansa Iban enggau raban bansa bukai di sarawak patut diangkat ba mata dunya laban Sarawak tu nengeri ti besai.

Iya madah, mensia mayuh ba serata dunya patut nemu penyelai enggau pengeraja ba menua tu.

Nya kebuah ku Ayie, iya ngena pelasar tu matak perati mensia mayuh ngambi sebaka enggau iya, rindu mansik sereta belajarka gaya pengidup bansa Iban di rumah panjai.

Iya madah deka matak perati mensia mayuh nengah chara masukka pengidup asal Iban di rumah panjai enggau elemen fiksyen dikena ngemanahka agi jalai cherita nya.

Ku Ayie, nadai ngaga filem dokumentasyen tang cherita katun ungkup merindang mensia mayuh.

Nambahka nya, Ayie madahka iya bisi nambahka jalai cherita ngambi filem tu ulih diterima mensia mayuh tang mengkang enggau tuju ke sebaka, nusuika pengidup bansa Iban.

Iya madahka video The Pillar Of Strength tu dikumbai Tiang Kekuatan tauka dikalih ngagai jaku kitai mai reti tungkat semengat.

Berebak enggau nya, cherita katun tu pasal siku anak Iban ti ngembuan semangat baka Petara Sengalang Burung ke mega nyadi tungkat semengat ngagai budaya, bansa enggau pengarap peturun Iban.

“Minta ampun, aku semina ulih nusuika mimit jalai cherita tu laban filem tu bedau tembu sereta enggaika mensia mayuh nyau enda ‘gagit’ pengudah cherita tu tembu ila.

“Nyadi, cherita tu nusui pasal kaul entara siku apai enggau anak iya sereta pejalai siku anak Iban ke bebendar deka ngelala penatai asal diri.

“Nya aja jalai cherita ke ulih dikunsi aku lalu pesan ke deka dikenatai dalam cherita tu iya nya, mensia patut ngintu rampa menua ngambi ulih ngempit kaul ti manah entara mensia enggau rampa menua.

“Pia mega, kitai patut ngembuan ulah bebasaka pangan diri sekalika entara mensia, jelu enggau rampa menua ngambi kitai idup lantang senang.

“Cherita tu mega ngenang pasal pemesai guna nyaga kaul enggau diri sebilik sereta sayauka pangan diri,”ku Ayie madahka pesan ti dikenatai dalam cherita katun tu.

Ba cherita katun nya, Ayie ngena dua kelulu baka Rentap Libau enggau Kanang anak Langkau laban iya chukup temegah enggau pemerani seduai ke udah berambunka nyawa nyaga pengelikun di menua tu.

Cherita katun tu endang pandak, pengelama lapan mimit aja tang ngundan mayuh cherita sereta jaku ajar.

Ayie mega madahka cherita katun ti pandak nya manah ungkup tuju pengerami lalu cherita katun tu ditengkebang dalam 15 bulan.

“Dalam cherita katun tu, aku ngena dua kelulu baka siku apai benama Kanang ke mega bujang berani ti semampai nyaga peninggi pendiau diri enggau pengarap aki ini sida kelia.

Kelulu kedua dalam cherita tu nya siku nembiak lelaki, anak Kanang benama Rentap nya siku nembiak ti sikar sereta kering ngereja pengawa beumur 12 taun.

“Aku ngena nama Kanang enggau Rentap nya bepelasarka sejarah bujang berani bansa Iban lalu seduai mega beberita endar dalam sejarah Iban di Sarawak.

“Aku nengkebang kelulu ngena nama dua iku bujang berani tu kelai aku bebasa sereta temegah ati mendingka sejarah pemerani seduai ngetanka menua tu.

“Tu aja chara dikena aku kelai bebasaka dua bujang berani lalu aku ngarapka pekara tu ulih diterima mensia mayuh kelebih agi bansa Iban.

“Palan ti dikena dalam cherita katun nya nunda rumah panjai bansa Iban enggau kampung ba Pulau Borneo beratus taun ke udah.

“Taja pia, chukup asa laban enda ulih nemuai ke Lubok Antu enggau Sri Aman ketegal mayuh penanggul ke nyadi kelebih agi maya pandemik Covid-19 tu.

“Kebuah pia laban aku nerima penerang madahka dua kandang menua nya mih nyadi palan pengentap pendiau keterubah raban bansa Iban sebedau sida mindah lalu ngiga endur baru ngagai selampur Tanah Sarawak.

“Kebendar, aku keran deka ngasaika pengidup asal raban bansa Iban baka meda sungai, gaya rumah panjai enggau pengidup asal raban bansa Iban ngambi bulih mayuh agi penemu enggau penerang ti engkeman,” ku iya nerang.

PENYANDING PENEMU

Lebuh ngiga kereban nengkebang cherita katun tu, Ayie nadai pilih bukai kelimpah ngena semua kereban ke bisi baka ngiga penerang ba Internet laban suntuk belanja.

Ayie majak meretika budaya bansa Iban pengudah bulih sanding penemu ari bakih iya benama Kenny ke mega nyadi penyanding penemu projek tu.

“Lebuh begulai enggau Kenny anak Tomy, iya udah nerang enggau silik pasal budaya enggau pengidup asal Iban ba rumah panjai.

“Kenny udah nusuika aku bemacham penyelai bansa Iban di Sarawak nyengkaum ari sukut pemakai asal, pengarap, ngepan asal, chara ngintu Gawai, gaya jaku Iban enggau ke bukai.

“Pemuas ke mendingka penerang dikenataika Kenny, aku berengkah ngelala pemesai guna tajau, terabai enggau chara ngena sumpit.

“Ukai semina nya aja, aku mega chukup temegah ati laban ulih ngelala genap chura pua kumbu ke chukup tebilang ukai semina ba menua tu tang udah dikelala ba tikas dunya.

“Penerang dikenataika Kenny tu meransang sereta narit ati aku deka nemu silik agi pasal budaya bansa Iban.

“Terima kasih nuju Kenny ke enda sanggu bekunsika penemu pasal gaya pengidup asal bansa Iban,” ku Ayie ke ngasaika diri chukup betuah laban diberi peluang belajar sereta meretika gaya pengidup bansa Iban di Sarawak.

Ayie madah, iya teulihka runding deka nengkebang cherita katun tu urung ujung taun 2018 lalu berengkah ngiga kereban betulis, gambar enggau video ba internet pasal gaya pengidup asal Iban di rumah panjai.

Pengudah ngempung semua kereban nya tadi, Ayie berengkah nengkebang cherita enggau bemacham versyen disaup dua iku bakih kereja iya.

Tembu nya, sida sebuat nyerenih kereban nya tadi enggau milih cherita ke pemadu manah nyadi filem pandak.

“Pengawa tu lubah tembu laban aku ngaga pengawa nya kediri ba renggat keterubah, lebuh ngaga cherita nya aku berengkah ngaga kelulu enggau masukka gaya rampa menua enggau jalai cherita nya.

“Renggat tu dikumbai nempa jalai cherita enggau renggat sebedau masukka kelulu nya.

“Tembu pengawa nempa jalai cherita nya, aku berengkah ngumpul tim ngambi ngaga animasyen enggau rampa menua dalam cherita nya ke tusah ditengkebang.

“Ninting hari, aku deka ngasuh bala tim masang video enggau lagu bansa Dayak baka lagu Sape, Tawak, Gong enggau ke bukai.

“Kebuah pia laban kami ngasaika diri semak enggau pengidup bansa Iban taja kami nengkebang cherita nya di Kuala Lumpur lebuh kami masang lagu nya.

“Chara tu nentuka tim aku ulih ngasaika pengidup bansa Iban lebuh nengkebang jalai cherita tu,” ku Ayie madahka chara nentuka sida ulih nengkebang cherita bepelasarka gaya pengidup asal bansa Iban.

LIAT ATI

Sekumbang nengkebang cherita pandak tu, Ayie madah sida sebuat napi mayuh pemar nembuka cherita lalu nentuka cherita ditengkebang sida nya nitihka gaya pengidup asal Iban.

Nya kebuah ku Ayie, iya bejalaika mayuh pansik pasal pengidup bansa Iban laban iya apin nemu silik pasal pengidup kitai Iban.

“Terubah suba, chukup pedis ngiga penerang laban apin ngelala orang tauka organisasyen ari Sarawak dikena ngulihka penerang pasal budaya enggau pengidup bansa Iban.

“Tambah mega, aku napi pemar maya pandemic Covid-19 enggau enda ulih bejalai ngujungka aku puntan ngulihka penerang ke mayuh ai baka di Muzium Sarawak enggau Kampung Budaya Sarawak.

“Tang aku enda putus pengarap lalu ngiga chara bukai baka bekelala enggau orang Iban nengah media rama ngujungka aku betemu enggau siku Iban ke mega pegawai soldadu bepangkat Sarjan benama Kenny anak Tomy.

“Naka pengaga ati lebuh Tomy setuju nyaup aku ngulihka penerang bepelasarka sejarah nyadi anak Iban lalu iya diambi nyadi penyanding penemu tetap projek tu.

“Pemar kedua nya aku diatu suntuk belanja laban aku begunaka besai belanja nentuka ulih nengkebang cherita ti bekualiti lalu ulih dianjung ngagai pengerami filem ba menua luar.

“Pekara ke balat ngasuh aku irau ati laban filem nya bedau tembu 30 peratus tang aku majak suntuk belanja dikena nembuka cherita tu.

“Aku ngarapka bisi orang sanggup mantu, nyukung sereta meri belanja ngemujurka filem pandak tu nyentuk tembu penuh bulan Julai tu,” ku Ayie.

Nya alai ku iya, organisasyen tauka sida ke deka nyukung enggau meri belanja ba cherita tau whatsapp ngagai iya ba lumur 018-7776737 tauka email ngagai cre8tvtoon@gmail.com lalu nama sida deka dipasuk dalam rintai nama ngaga filem pandak tu.

Kenang ke meruan dikeingat sekumbang ngaga cherita tu iya nya pandemik tu udah ngasuh pengawa sida mar dipejalai baka sekeda penero dalam cherita tu kala kena rampit igi penyakit Covid-19 ngujungka pengawa sida lubah tembu.

PEMANSANG REBAK BARU

Bisi 20 iku ti ngemujurka pengawa nengkebang cheirta katun tu nyengkaum bala para animators, inking artists, production designers, background artist, compositor, editor sereta nyengkaum iya empu ke nyadi produser enggau direktor.

Tebal agi, semua penero tu agi biak lalu bisi sekeda ngembuan peneleba kurang ari setaun dalam bidang tu tang landik sereta ngembuan runding ti kreatif.

“Tim aku tu mega ex-pelajar aku laban aku mega siku pengelicha sementara ba sekeda palan pelajar tinggi. Nya kebuah aku ngena peluang tu milih bala nembiak ke ulih gawa enggau aku pengudah sida tembu belajar.

“Kelimpah ari nya, aku mega minta sanding penemu ari bakih ti ngembuan mayuh peneleba ba industri filem pandak sebedau tu.

“Chukup gaga ati laban kala disaup sekeda mentor ari pakar animasyen, pengari stesyen televisyen, produser enggau direktor animasyen ke udah nempa mayuh pemujur sebedau tu,” ku Ayie gaga ati laban cherita tu mujur dipejalai berekat sukung semua.

Ngelansa silik, Ayie madahka pemansang teknologi digital kemaya hari udah ngenataika mayuh penguntung ngagai mensia mayuh kelebih agi rebak baru.

Ku iya, teknologi digital tu mega udah nyaup ngangkatka budaya genap raban bansa ngambi dikelala orang bukai ba dunya tu.

Ambika banding, apin lama ke udah iya udah ngagai bengkel online bekunsika seni nero enggau animasyen ngagai mensia mayuh.

Ayie tekenyit laban bengkel online diatur iya narit ati bala nembiak ari Sarawak enggau Sabah lalu tu nunjukka pelasar digital nadai adan.

“Aku masuk dalam dunya animasyen tu kenyau ari taun 1995 maya beumur 19 taun enggau nyentuk diatu.

“Aku nadai kala belajar pasal animasyen lalu semua nya dipelajar aku ari peneleba gawa.

“Sebedau tu aku mega suah masuk dalam projek animasyen TV baka ‘Usop Sontorian’ (1995), filem animasyen ‘Silat Legenda’ (1999), filem animasyen ‘Puteh’ (2002), animasyen TV ‘CJ the DJ’ (2008), animasyen TV ‘Mustang Mama’ (2004) enggau ke bukai.

“Ba taun 2010, aku berengkah numbuhka produksyen kediri dikumbai Creatvtoon Studio,” ku Ayie nyimpul randau enggau Suara Sarawak.