LEGENDA enggau mayuh turai sejarah lama!
Nya sadang penemu siku penengkebang cherita animasyen, Ayie Ibrahim lebuh ditanya senentang nama penyelai di Sarawak ti udah ngasuh iya labuh pengerindu ngagai Tanah Kenyalang tu.
Ayie madah, The Pillar of Strength agi besemekih ba sekeda pengerami filem antarabansa.
“The Pillar of Strength tu nadai dipeda ba dini-dini pelasar media rama kelimpah dipeda ba pengerami antarabansa aja.
“Timbal ti diterima ari bala akim bechampur tang tebal agi sida mega timbal positif enggau chukup manah.
“Kebuah pia laban mayuh meri sadang penemu, jalai cherita filem animasyen tu chukup nyelai enggau chura main asal ti dipandang.
“Lalu filem tu mega mai pesan ti chukup dalam enggau besai reti,” ku iya ngelansa pasal animasyen tu.
Nampung randau, Ayie madah, udah tu iya merambu deka ke filem nya nyadi filem careka animasyen pengelama 90 minit.
Terang iya, sida benung ngemujur pekara nya tang pengawa tu begunaka besai belanja.
NYULUT
“Aku enggau tim benung ngemujur pekara tu tang pekara ti nyadi penekul diatu nya ari sukut agih belanja laban kami begunaka besai belanja nyapai juluk ati tu,” ku iya.
Entara anugerah udah dipenggi The Pillar of Strength iya nya Best Nature Film, Global Short Film Awards (GSF Awards) USA 2023, Best Video Animation, Maria Luisa Photo & Video Film Festival Spain 2023, Best Debut Short Film, Bridge of Peace International Film Festival, France 2022 enggau Best Character-Based Short Animation, Los Angeles Animation Festival, USA 2022.
Bisi mega Best Animated Short, International Motion Picture Awards, Canada 2022, Award Winner, International Companion Animal Film Festival, Seoul, Korea 2022, Best Animated Short, Golden FEMI Film Festival, Bulgaria 2022 enggau Best Animation & Effects, The Archaeology Channel International Film Festival USA 2022.
Filem animasyen tu mega bulih Anugerah Best Animation, Athens International Digital Film Festival AIDFF, Greece 2022, Best Animated Film, FOCUS International Film Festival, Florida, USA 2022 enggau Best Animated Short, Best Istanbul Film Festival, Turkiye 2022.
Anugerah bukai baka Best Animation, Couch Film Festival, Toronto, Ontario, Canada 2022, Best Animation, Emerald Peacock, Berlin, Germany 2022, Best Animation, Cinematic European Film Festival, Romania 2022, Best Short Film, Golden Harvest Film Festival, Tokyo, Japan 2022, Best Animation, ARG International Film Festival, Paris, France 2021 enggau Best Animated Short, Europe Film Festival, United Kingdom 2021.
PENGELELAK TEBALAS
Pengudah menggi lebih 15 anugerah, Ayie madahka diri enda ngadang, temegah enggau gaga laban semua pengelelak iya enggau tim ngiga penemu enggau buah runding ngelama tu udah tebalas.
“Enti ditanya pasal pejalai ngemujur projek tu, endang lelak tang tu pengawa dikerindu kami, sigi dikereja enggau naka pemanah.
“Nya kebuah, pengawa tu begunaka timpuh lama, meseti puh lalu enggai ninchai ke pengawa.
“Ari hari keterubah ngepunka projek tu, aku semampai mesan bala bukai ngereja pengawa tu enggau pengabis ati, anang ninchai laban kami deka bulih asil ti ngemantupka ati.
“Aku mega suah mesan sida begulai ngaduka pengawa tu ngambi lempung sereta ulih ditembu nitihka timpuh.
“Kebuah pia laban juluk ati aku nengkebang filem animasyen tu berambaika jaku Negapka Main Asal udah diterima ba mata dunya.
“Ari pengingin ati enggau labuh pengerindu ngagai budaya Borneo, juluk ati aku deka meda filem animasyen tu dikelala ba serata dunya udah nyadi nyata.
“Sigi enda mudah nyuluk penyulut tang semua nya deka nyadi nyata enti ngembuan pengingin disempulang pengeransing ati.
“Ari pengawa kami ngepunka projek lalu diatu udah menang lebih 15 anugerah antarabansa, dia kami sebuat tuchum gaga lebuh ngenang pengelelak nembuka filem tu.
“Enda mudah. Terus terang aku madah, taja pen tu filem animasyen tang chukup mayuh pengawa enggau andau penguji ditempuh kami ngambi ulih datai ba ‘adan’ enggau pemujur dikedeka nya.
“Tang berekat ati ti sabar enggau liat, juluk deka meda The Pillar of Strength tebilang, pegari nama ba mata dunya udah nyata nyata!” ku iya ngenang semua pekara ke udah nyadi nya.
PROJEK BARU
Berindik ari pemujur The Pillar of Strength ke mai reti tungkat semengat tu, Ayie madah, udah tu bisi projek baru tang enda ulih dipadah diatu.
Ku iya, projek tu agi bekaul pengawa nyagu main asal enggau daya idup komuniti di Malaysia.
Ba penemu Ayie, pemansang animasyen ba Sarawak chukup manah.
Ku iya, kitai ulih meda baka ni cheirta katun baka Boboiboy, Mechamato, Upin Ipin, Didi & Friends enggau ke bukai udah meri empas manah ba kualiti animasyen di Malaysia.
Tang ku iya, utai disebut nya animasyen tin gena pelasar 3D tang diatu kitai agi ngiga kualiti ti manah ba animasyen 2D ba Malaysia.
“Nya kebuah, aku deka nengkebang animasyen 2D enggau bepelasar adat enggau main asal lalu nengah chara tu, dunya ulih ngelala nama penyelai Malaysia.
“Nyau ngenang pasal penekul deka nemuai ngagai Sarawak kelebih agi Lubok Antu, aku agi ingin nemuai ukai semina ngagai Lubok Antu tang mega ngagai sekeda menua ulu di Sarawak.
“Kebuah pia laban aku nemu, agi tubah turai sejarah enggau pesaka asal Sarawak empai diserungkai enggau dikelala komuniti dunya.
“Baka ditemu kitai, pupu bansa di Sarawak ngembuan seribu penyelai lalu aku keran nyerungkai enggau nengkebang animasyen ari adat asal, main asal enggau daya idup komuniti di Borneo.
Baka dipadah ari pun, Ayie madah, juluk ati iya nengkebang animasyen The Pillar of Strength endang deka nyaguka main asal.
Ari pengawa nya, The Pillar of Strength udah diterima mayuh pengerami filem enggau animasyen ba menua luar.
“Lalu lebuh pekara nya nyadi, dia aku meda mayuh orang ngiga penerang pasal main asal komuniti Dayak di Sarawak kelebih agi ba Borneo.
“Pengudah pekara nya nyadi, manah tauka enda inisiatif nya matak temuai raun ngagai menua kitai?
“Tu mega tanggungpengawa aku nyadi penengkebang filem animasyen.
“Aku enggau bala bukai keran ngelakuka produk enggau main asal Malaysia nadai ngira raban bansa enggau jalai pengarap,” ku Ayie nyemetak.
