KUCHING: Tiang 5G Keterubah ba Asia Tenggara ti dikuasa Sistem Mikrogrid Solar ngagai Hidrogen ti diasil Palan Penyulut Teknikal Sarawak (CENTEXS) ulih ngemanah tikas idup peranak ba menua pesisir Sarawak.
Premier Sarawak, Datuk Patinggi Tan Sri Abang Johari Tun Openg madahka sistem nya bisi kapasiti penyampau 425 kWp enggau 780 panel solar ke mega sistem solar pemadu besai ba menua tu.
Ku iya, sistem alternatif nya dikena ngemanah tikas idup peranak ba menua pesisir nentu sida disikap bekal kuasa karan enggau nentu nembiak ulih belajar maya malam hari.
“Kelimpah ari nya, pekara tu ulih nyukung pemansang industri kotej, nyendia peluang penatai pemisi tambah nengah pemansut produk menua baka kuie enggau ke bukai,” ku iya.
Abang Johari mansutka jaku nya lebuh Pengawa Bejadi Simposium enggau Eksibisyen Kuasa Gadung Sarawak (GEES) 2023 di CENTEXS, ditu, kemari.
Berebak enggau nya, iya meri jamin Perintah Sarawak deka nyukung penuh inisiatif CENTEXS ngerembaika sistem nya ngagai sitak menua pesisir enggau menua ulu.
“Sarawak diatu chukup maju enggau bisi pengulih besai ba pemansang hidrogen enggau ekonomi gadung lalu kitai diatu benung nuju ekonomi bepenatai pemisi tinggi manggai taun 2030.
“Menua kitai mega diberekat enggau pengeraja asal ti nyadi pemansut kuasa gadung enggau nyungkak ekonomi gadung.
“Nya kebuah, kitai meseti ngena manah pengelebih tu.
Nengah hidro enggau panchar mata panas nyadi pemansut kuasa udah mansutka pangka positif ti deka nambahka pemansut ba Sarawak.
“Kitai meseti nambahka ekosistem enggau ngemanah infrastruktur nyengkaum sistem digital enggau matih modal mensia laban menua kitai ngembuan mayuh pemansut sereta ngena pemansang teknologi,” ku iya nyemetak.
