TIF inisiatif manah ungkup dagang temuai

KUCHING: Wang Turu Infrastruktur Dagang Temuai (TIF) nyadi siti ari inisiatif dalam nambah sereta ngemanahka agi infrastruktur dagang temuai ti udah bisi.

Menteri Wang Malaysia, Lim Guan Eng madah tu nengah TIF tu, pengemeran industri dagang temuai ulih minta dikena ba pengawa meli tanah, ngaga begunan, perengka guna pemun,m sereta aset bekaul enggau pengawa dagang temuai.

“Nengah TIF tu mega, kami ngarapka iya ulih nyadi siti ari jalai nambahka pelaburan lebih agi ba pemansang dagang temuai.

“Diatu, kitai agi begunaka infrastruktur kelas dunya dikena narit bala temuai datai ngagai palan penemuai enggau muntang, sereta perengka guna ti chukup ngambika sida ngembuan pengingat dibai sida pulai pengudah kemisi ba menua kitai,” ku iya.

Guan Eng madah munyi nya rambau pengerami bejadika Tabung Infrastruktur Dagang Temuai (TIF) ti diatur ba siti hotel tebilang ba ditu, lemai tadi.

Nangkan nya, ku iya pengawa ngemanahka infrastruktur dalam pengawa dagang temuai ulih mai pemansang ngagai pengawa ekonomi.

“Pemansang sereta pengawa ngemanahka infrastruktur siti ari pra-syarat ngambika palan dagang temuai ulih diubah nyadi palan ti dikerinduka bala temuai menua luar.

“Kami pechaya nengah industri dagang temuai, Malaysia bisi penau ti besai ulih seruran mansang ba taun ti deka datai,” ku iya.

Tu ulih dikemujurka agi nengah mayuh infrastruktur, polisi, pengawa narit sereta insentif ti dipejalaika, ku Guan Eng nambah.

BEJADI TIF… Guan Eng begulai enggau Menteri Dagang Temuai, Seni enggau Main Asal Malaysia Datuk Mohammadin Ketapi (bediri ari kiba) bejadi pengerami Tabung Infrastruktur Dagang Temuai (TIF) , lemai tadi.

Suara Sarawak