Tiga agi kluster baru ditemu di Sarawak

KUCHING: Sarawak majak ngerikodka tiga agi kluster baru Covid-19 iya nya di Pelilih Menua Miri, Bintulu enggau Kota Samarahan.

Komiti Penyangga Penusah Ngenyit Nengeri (JPBN) dalam siti penerang media madahka, kluster baru tu iya nya Kluster Jalan Gridbid di Miri, Kluster Kampung Baru Hilir di Samarahan enggau Kluster Jalan Tanjung Kidurong di Bintulu.

Ba penerang nya, Kluster Jalan Gridbid ngaul sebuah komuniti di Jalai Datuk Gridbid, Lutong ti datai ari siku lelaki beumur 71 taun.

Iya bepun nunjukka kelai kena rampit kena 16 March sebedau dibai ngagai Sepital Miri.

Lelaki tu siku pengaji ladang sawit ditemu bisi tabin enggau batuk kena 10 March ba Ulu Teru pengudah ngelawa pengawa miring kena 5 March di Kampung Pasir Miri.

Nangkan nya, Kluster Kampung Baru Hilir ditemu ari sebuah komuniti di Kampung Baru Hilir nengah siku lelaki beumur 65 taun.

Lelaki tu gawa kediri lalu dipelaba dirampit ari komuniti iya empu.

Pia mega, kes kala gawa nyadi pengereja kunterik di Miri kena 2 nyentukka 12 March apin lama.

Iya gawa begulai enggau lima iku bakih semenua ke alai semua sida mega ditemu positif Covid-19.

Berebak enggau nya, Kluster Jalan Tanjung Kidurong ngaul sebuah genturung rumah perintah di Tanjong Kidurong Bintulu.

Kes tu ditemu ari siku lelaki beumur 50 taun laban bisi nunjukka kelai kena 20 March tu tadi.

Kes tu gawa nyadi siku pengajar ba sebuah sekula primari di Sungai Tisang, Bintulu lalu dipelaba dirampit ari komuniti ba Bintulu empu.

Suara Sarawak