Tiga ari 21 kes baru positif ditemu di Lundu

KUCHING: Bisi tiga kes baru dirikodka ba Pelilih Lundu pengudah bejalaika Pengawa Nyidi Kes Ngerekai (ACD) ba Kampung Telok Melano, Lundu, sehari tu.

Tiga kes nya peranak menua iya nya dua iku indu enggau siku lelaki beumur entara 34 ngagai 62 taun lalu ditemu positif kena 2 November tu tadi.

Dua kes nya ditemu bisi kelai renga enggau batuk berengkah ari 30 enggau 31 Oktober tu tadi lalu semua udah dipasuk ngagai Sepital Besai Sarawak (SGH).

Komiti Penyangga Penusah Ngenyit Nengeri Sarawak (JPBNS) madahka Sarawak ngerikod 21 kes iya nya 12 kes ba Pelilih Kuching enggau bela tiga kes ba Miri, Lawas enggau Lundu ngujungka kes nambah 927.

Chairman iya, Datuk Amar Douglas Uggah Embas madahka Kluster Green Hill ngerikod lapan kes baru ke alai enam kes nya ditemu nengah pengawa beperesa kontak semak ngagai kes ke-877.

Suara Sarawak