Tiga ari finalis ACSJ bela bisi pengelebih

Frederick Sut, Taju Remaong enggau NK Yongai

Alah menang adat bepekit. Enti enggai alah manah enda ibuh enggau bepekit.

Champion ke amat iya nya orang ti ke ulih nerima pengurang diri enggau pengelebih orang bukai.
Sida enda ngasaika diri alah nya ngelemika semengat sida. Iya enda mudah putus pengarap lalu semampai ngiga akal ti baru awakka iya ulih menang ba pekit ke dudi ila.

Disimpul ngena jaku pandak, champion ke amat iya nya nerima semua pemutus enggau ati ti tebuka sereta positif.

Berita ACSJ Ke-6 ke sekali tu maika kita berita enggau cherita ke pemadu baru ari raban finalis pekit tu iya nya Frederick Sut, Taju Remaong enggau NK Yongai.

Sida tiga beentaruhka lagu tebilang diri iya nya Anyut ( Frederick Sut), Jempuk (Taju Remaong) enggau Indai (NKYongai).

Frederick Sut

Ada dalam taun 1985, Frederick madahka penatai diri ari Igan Sibu. Diatu iya gawa nyadi pengajar ba SK Nanga Metah Kapit.

Kelimpah ari pengawa ngajar enggau belagu, Frederick mega siku komposer lagu enggau nulis leka lagu.
Penanyi Iban ti dikerinduka iya nya Andrew Bonny James, Rickie Andrewson enggau Winnie Albert.
Penanyi luar nengeri ti dikerinduka iya nya Judika, Adele enggau Dato’ Siti Nurhaliza.

Ba ACSJ 6 tu Frederick Sut deka mai lagu Anyut. “Lagu Anyut tu besai endar reti ba aku.
Sigi mayuh pemar maya kitai ke besulu lalu mayuh mega danji enda ngelengkaka pangan diri.

Kitai semina merambu tang Tuhan ti nentuka semua. Cherita sinu ba Anyut tanggam pengerindu ti enda ulih ditanka agi laban kelalu mayuh penguji.

Pengerindu nya anyut ti bepengujungka beserara”, ku Frederick Sut becherita pasal lagu popular iya Anyut.

Ba ACSJ, Frederick Sut ukai orang baru laban iya udah kala nyadi finalis ba taun 2015 lalu nyadi semi-finalis taun 2016.

Ari taun 2013 nyentuk ngagai 2019 Frederick udah kala ngeluarka siti album penuh enggau empat iti single.
Peminat Frederick Sut terus nyukung sereta besampika pemujur iya.

Taju Remaong

Raban Taju Remaong nya entara artis popular Iban. Udah kala nyadi champion ACSJ 4 enggau lagu sida Pengerindu Enda Bebagi.

Dalam taun 2017 Taju Remaong bulih lumur dua lalu maya nya sida mai lagu Sepuluh Jari.

Raban Taju Remaong ke datai ari Kapit bisi enam iku iya nya Ery Lang (Vokalis), Uchaq (Gitar Satu), Alvin (Gitar kedua), Maxwell (Bass), Onie (Keyboard) enggau Tiu (Drum).

Ba ACSJ 6 Taju Remaong deka mai lagu Jempuk. Ditanya sentang lagu Jempuk, Alvin madah, “Kelimpah ari melodi enggau muzik, lagu Jempuk ngembuan lirik ti chukup badas.

Jempuk digaga vokalis kami Ery Lang lalu 33 minggu lekat ba carta. Iya nyadi juara carta pengelama 4 minggu.
Aku arap Jempuk ulih ngangkatka tikas pemanah lagu Iban lalu serebak enggau nya ulih mega nyungkak pemanah nama industri muzik Iban”, ku Alvin meri penerang pasal lagu sida Jempuk.

Alvin enggau bala Taju Remaong ke bukai bela ngarapka peminat TR terus nyukung sida ba ke selama.
Ukai naka nya aja tang besampi mega ke pemujur sida ba ACSJ 6 ti deka diatur ba Auditorium P Ramlee RTM Kuching kena 28 September 2019.

NK Yongai

NK Yongai asal ari Miri Sarawak. Gawa nyadi Pembantu Perangkaan Ekonomi pengudah nembuka pelajar iya ari UiTM Samarahan.

Ari taun 2016 nyentuk ngagai taun 2019, NK Yongai udah ngeluarka beberapa iti single enggau album Geregaya Ati.
Album nya mujur dilancharka iya kena 25 May 2019 di The Summer Mall. Album nya dikeluarka Kaban Music Production enggau producer iya Randhi Enrique.

Siti single ti udah dikeluarka iya nya Sempun. NK Yongai mega bisi ngaga lagu Leka Sampi ke Hallvard Band enggau Jelungan ke Nathalie Anik.

Ba ACSJ 6 NK Yongai mai lagu Indai. Ditanya sentang lagu Indai, NK Yongai lagu nya besai reti ba semua orang.

“Ba aku lagu Indai tu sigi chukup besai reti. Enti ukai indai sapa ti ngadaka kita, enda pia?

Pengasih enggau penyayau indu nadai ganti, enda ulih dibeli laban indai semina siku aja di dunya tu”, ku NK Yongai ke diatu enda ulih jenuh diau di rumah laban semampai bisi show kin kia di serata Sarawak.

Lagu Indai mega ku NK Yongai meri lalau ngasuh kitai nyaga sereta meri pengasih ti pengabis manah ngagai apai indai diri.

Tambah mega ku iya semua berekat pengawa endang datai ari apai indai.

Nyaut tanya pasal pengarap iya ba ACSJ 6 tu, NK Yongai ngarapka diri mujur sebaka mega enggau finalis.
“Terima kasih ngagai semua kita ti udah meri sukung ngagai aku ngelama tu.

Terus undi lagu-lagu finalis ti dikerunduka kita lalu besampi mih ke pemujur semua kami”, NK Yongai ngujungka randau kami sebuat.

Ba enda milih nama bansa pekit tauka anugerah, semua pemekit bisi strateji enggau pengelebih kediri.
Nya mih senyata resia siku-siku sida tang pekara nya ukai utai ti dipekunsika enggau pangan diri, semina diri empu aja nemu.

Kitai arapka ACSJ Ke-6 ulih mai pengelantang enggau pengaga ngagai semua. Muzik enggau lagu ulih nyadi siti medium ti ulih ngedut kaul entara raban bansa ti lebih manah.

Kelimpah ari nya kitai mega arap ACSJ Ke-6 ulih ngangkatka kualiti enggau standard lagu Iban ke mega ulih didinga bansa bukai nengah mayuh bengkah steseyen enggau sistem penabur.

Suara Sarawak