Tiga bas hidrogen berengkah diuji bulan tu

KUCHING: Tiga bas hidrogen deka berengkah bejalai dallam bulan tu ungkup timpuh nguji.

Kepala Menteri Datuk Patinggi Abang Johari Tun Openg madah kitai deka nguji bejalaika pengawa ngena perengka pengangkut enggau chara ti baru sereta lebih ngagai pengawa nyaga rampa menua kitai.

“Enti suba, kitai udah nguji ngena bas elektrik, kitai ngena bateri lalu selampur dunya mega bisi penanggul dalam pengawa ngena bateri nya.

“Bateri nya patut diganti lalu kitai ba Sarawak nguji deka ngiga jalai pansut ari penanggul nya nengah numbuhka bas hidrogen,” ku ya.

Abang Johari madah munyi nya lebuh bejaku ba Pengerami Ngingatka Hari Mengeri Kuching ke-31 di Dewan Kompleks Islam Sarawak ditu, kemari.

HARI MENGERI KUCHING KE-31… Abang Johari bejadika Hari Mengeri Kuching ke-31 kemari di Dewan Kompleks Islam Sarawak.-GAMBAR GHAZALI BUJANG

Nangkan nya ku iya, kita deka nyendiaka perengka pengangkut ti efisien sereta mai pemanah ngagai rampa menua asal.

“Diatu kitai deka ngena bas hidrogen lalu endang udah ngembuan tiga bas ti ngena kuasa hidrogen nya ti deka berengkah diuji bulan tu.

“Hidrogen dipansutka ari ai lalu kitai ba Sarawak chukup mayuh enggau pengeraja nya, nya alai kitai ngena nya ba bas kitai,”ku iya.

Kelimpah ari nya, Abang Johari madah Kuching nyadi mengeri keterubah ti ngembuan bas hidrogen di Asia Tenggara.

“Kaban kitai ba Indonesia ngena hidrogen ba kereta api.

“Tang ba Sarawak, kitai ngena hidrogen nya ba perengka pengangkut baka bas enggau moto,” ku iya.

Berebak enggau nya, pengudah 31 taun nyadi mengeri besai, mayuh oekara berubah ba Kuching nyengkaum perengka pengangkut.

Sama bisi datai Sapit Kepala Menteri Tan Sri James Jemut Masing, Datuk Bandar Dewan Bandar Dewan Bandaraya Kuching Utara (DBKU) Datuk Abang Abdul Wahap Abang Julai, Datuk Bandar Kuching Selatan Datuk James Chan Khay Syn sereta pengari bukai.

Suara Sarawak