Tiga buah gerija nerima bantu ari Unifor

KUCHING: Unit Pekara Pengarap Bukai (Unifor) ngagihka bantu belanja penyampau RM130,000 dikena ngaga dua buah gerija baru di Sibu enggau nyeruri sebuah rumah pastor di Limbang.

Sapit Kepala Menteri ti mega menteri ti megai tanggungpengawa Unifor Datuk Amar Douglas Uggah Embas madahka bantu belanja tu dikena nyeruri rumah pastor Gerija BEM Long Sepangeh sereta ngaga Gerija Methodist Iban Tanjung Latap enggau Gerija Methodist Iban Rantau Panjai ti baru.

“Adun Batu Danau Paulus Palu Gumbang nyadi pengari nerima chek RM50,000 dikena nyeruri rumah pastor lalu Sekretari Kepala Menteri Romeo Christopher Tegong nyadi pengari nerima chek RM50,000 enggau RM30,000 dikena ngaga gerija baru di Tanjung Latap enggau Rantau Panjai,” ku iya dalam siti penerang media, kemari.

Unifor sebuah unit dikena mantu pengarap bukai di Sarawak ngaga sereta nyeruri rumah sembiang kelimpah mantu pekara ti bekaul enggau pengarap di menua tu.

Bagi taun 2018, Kepala Menteri Datuk Patinggi Abang Johari Tun Openg udah ngagihka RM20 juta agih belanja ba baruh Unifor.

Agih belanja tu nambah ngagai RM30 juta ba taun 2019, sebedau niki ngagai RM50 juta ba taun 2020.

Suara Sarawak