Tiga DCM deka nyimpul jurai ba hari kepenudi baum

KUCHING: Tiga Sapit Kepala Menteri (DCM) deka nyimpul jurai sida ba hari kepenudi Aum Kedua Renggat Kelima Dun Ke-18, minggu baru.

Speaker Dun Datuk Amar Mohamad Asfia Awang Nassar madah, sebedau tu semina Kepala Menteri aja dipadahka deka nyimpul jurai ba aum besai Dun.

“Ke sekali tu, tiga Sapit Kepala Menteri bela deka nyimpul jurai ba pagi hari lima, 13 November tu.

“Sida deka nyimpul jurai sida nitihka ripih bepun enggau Datuk Amar Awang Tengah Ali Hasan lalu ditangkan enggau Tan Sri James Jemut Masing sereta Datuk Amar Douglas Uggah Embas,” ku iya.

Asfia madah munyi nya ba aum pemberita beserimbai enggau Aum Kedua Renggat Kelima Dun Ke-18 ti deka diatur berengkah 9-23 November tu di Indu Opis Parti Pesaka Bumiputera Bersatu (PBB) ditu, kemari.

Nangkanka nya ku iya, Kepala Menteri Datuk Patinggi Abang Johari Tun Openg deka nyimpul jurai iya pukul 3 lemai ba hari ke sama.

Berebak enggau nya, Asfia madahka bisi 342 tanya ungkup saut lisan sereta betulis diterima ari 45 iku Adun ke alai Opis Kepala Menteri (CMO) nerima tanya pemadu mayuh iya nya 68 tanya.

“Ungkup saut lisan, CMO nerima 56 tanya, Opis Menteri Infrastruktur enggau Pemansang Kapal (46), Opis Menteri Kaunsil Kandang Menua enggau Pengawa Berumah (41), Opis Menteri Betanam Betupi, Tanah Adat enggau Pemansang Kandang Menua (32), Opis Menteri Utiliti (31), Opis Menteri Pemansang Mengeri enggau Pengeraja Asal (24) lalu Opis Menteri Pelajar, Sains enggau Teknologi Pansik nerima 23 iti tanya.

“Kelimpah ari nya, Opis Menteri Dagang Entarabansa enggau Industri, Terminal enggau Pemansang Orang Dagang (Mintred) nerima 14 iti tanya, Opis Menteri Pengintu Pengelantang Pendiau, Komuniti, Orang Indu enggau Pemansang Anak Mit (KWKPK) nerima 10 tanya, Opis Menteri Dagang Temuai, Seni enggau Main Asal (10), Opis Menteri Nembiak enggau Lumba (4), Opis Menteri Wang enggau Langgur Ekonomi (2) lalu Opis Menteri Perengka Pengangkut nerima dua iti tanya,” ku iya nerang.

Ku Asfia, ari penyampau nya, bisi 294 tanya diterima ari 43 iku Adun ungkup saut lisan lalu 48 iti tanya ari semilan Adun diterima ungkup saut betulis.

Ba saut betulis, Asfia madahka CMO nerima 12 iti tanya, ditangkan enggau Opis Menteri Betanam Betupi, Tanah Adat enggau Pemansang Kandang Menua (10), Opis Menteri Infrastruktur enggau Pemansang Kapal (6), Mintred (5), Opis Menteri Pemansang Mengeri enggau Pengeraja Asal (5), Opis Menteri Pelajar, Sains enggau Pansik Teknologi (3), Opis Menteri Utiliti (3), Opis Menteri Kaunsil Kandang Menua enggau Pengawa Berumah (2), lalu Opis Menteru Wang enggau Langgur Ekonomi sereta Opis Menteri Dagang Temuai, Seni enggau Main Asal bela nerima siti tanya.

Suara Sarawak