Tiga inisiatif nyungkak pengawa ngasilka berau

SRI AMAN: Perintah Sarawak udah nemu tiga inisiatif ba pengawa nyapai 70 peratus tikas ngidupka diri dikena ngasilka berau nengeri manggai taun 2030.

Menteri Muda Betanam Betupi Moden, Tanah Adat Enggaun Pemansang Kandang Menua, Datuk Roland Sagah Wee Inn madah, inisiatif keterubah iya nya nentuka bekal benih padi seruran chukup.

“Inisiatif kedua iya nya ngemanahka infrastruktur kandang umai enggau bejalaika pengawa bumai ngena injin tauka ngena teknologi baru,” ku iya.

Roland ke mega Adun Tarat madah munyi nya ba Program Nyadung Benih Padi Bekualiti ba sebuah umai di Kampung Limau Pantu, kena Hari Dua tu tadi.

Berebak enggau nya, Roland madah, dikena nentuka stok benih padi seruran chukup, padi moden ke bisi peluang meri asil ke mayuh enggau timpuh mansau ti jampat baka MR269, MR297 deka diberi nukar kualiti benih padi lama.

Kenu ku iya, ari pengawa nanam padi ke bekualiti, nya tentu deka nyungkak asil enggau ngamatka juluk ngangkatka tikas pengidup rayat maya taun 2030.

Sama bisi datai Menteri Muda Nembiak enggau Lumba Datuk Snowdan Lawan, ketuai ejensi perintah, bala ketuai raban bansa enggau ke bukai.

Suara Sarawak